Pétur var gestur í Reykjavík síðdegis á Bylgjunni þar sem rætt var um komandi borgarstjórnarkosningar, stöðu íþróttamannvirkja, leikskólamál, samgöngur og mögulegt samstarf að kosningum loknum.
Hann sagði kosningabaráttuna ganga vel en viðurkenndi að hún tæki á.
„Mjög margt er mjög skemmtilegt en svo er alveg leiðinlegt líka,“ sagði Pétur og vísaði til þess að orkan tæmdist stundum eftir marga fundi sama daginn.
Hann sagði framboðið hafa farið víða um borgina, hitt íþróttafélög, hagsmunasamtök og fólk í hverfunum. Það hefði styrkt þá sýn hans að Reykjavík væri sterk borg.
„Mér finnst Reykjavík algjörlega meiriháttar. Mér finnst borgin frábær,“ sagði hann.
Mikil uppbygging
Pétur var spurður út í þá staðreynd að Samfylkingin hefur setið í meirihluta í Reykjavík frá árinu 2010 og hvort ekki væri tímabært að spyrja hvar lofaðar framkvæmdir, meðal annars íþróttahús í Laugardal, stæðu.
Hann sagði nauðsynlegt að setja stöðuna í samhengi. Íbúum Reykjavíkur hefði fjölgað mikið á undanförnum árum og áherslan hefði verið á uppbyggingu og skipulag, meðal annars í Úlfarsárdal þar sem nýtt hverfi hefði risið.
„Gömlu hverfin hafa aðeins setið á hakanum,“ sagði Pétur.
Hann nefndi að borgin hefði á sama tíma glímt við áhrif faraldurs, eldsumbrota á Reykjanesi, stríðs í Evrópu og hárra vaxta. Hann sagðist þó ekki vera að afsaka stöðuna heldur setja hana í samhengi.
„Mér finnst fólk ennþá ánægt, en það er alveg öskrað eftir breytingum,“ sagði hann.
Segir Laugardalinn í forgangi
Pétur sagði stöðu íþróttamannvirkja í Laugardal alvarlega. Skólar í hverfinu væru fullir og börn æfðu enn í Laugardalshöll. Ekki væri hægt að treysta á höllina sem lausn fyrir börn og íþróttafélög.
Hann sagði Þjóðarhöllina hafa átt að leysa hluta vandans en hún væri ekki komin. Þar bæri ríkið ábyrgð að hans mati. Þá nefndi hann að Ármann, sem heldur meðal annars úti öflugu starfi í körfubolta, væri eina félagið í Reykjavík án innanhússaðstöðu.
Pétur sagði Laugardalinn nú efstan á forgangslista en vildi ekki gefa út loforð um skjóta lausn.
„Ég get ekki sagt að það séu til einhverjar einfaldar hókus pókus lausnir og að það verði komið hús eftir 100 daga inn í næsta kjörtímabil. En ég veit að Laugardalurinn, sívaxandi hverfi, er í forgangi.“
Vill lögfesta rétt barna til leikskóladvalar
Málefni barna eru efst á baugi hjá Samfylkingunni, að sögn Péturs. Flokkurinn vill fjölga leikskólaplássum um 1.500 og lögfesta rétt barna til leikskóladvalar að loknu fæðingarorlofi foreldra.
Pétur sagði eðlilegt að ríkið kæmi að því verkefni og viðurkenndi leikskólann sem fyrsta skólastigið.
„Þetta hlýtur að vera hið besta mál að ríkið viðurkenni loksins fyrsta skólastigið,“ sagði hann.
Hann var einnig spurður út í gagnrýni Kristrúnar Frostadóttur forsætisráðherra á svokallað Kópavogsmódel. Pétur sagði það eðlilegt að jafnaðarmannaflokkur benti á muninn á leiðum sveitarfélaga í leikskólamálum.
Hann sagði að samkvæmt þeim upplýsingum sem Samfylkingin vísaði til gæti munað allt að hálfri milljón króna á ári fyrir fjölskyldu með tvö börn á leikskóla eftir því hvort hún byggi í Kópavogi eða Reykjavík.
„Við erum jafnaðarmannaflokkur. Og við verðum að passa upp á allt fólk,“ sagði Pétur.
Samgöngumálin eitt stærsta kosningamálið
Aðspurður hvar stóru málin lægju sagði Pétur þau vera mörg. Barnamálin væru í forgangi hjá Samfylkingunni, ekki síst málefni barna með annað móðurmál en íslensku. Það væri, að hans mati, ein besta fjárfesting borgarinnar til framtíðar.
Hann sagði þó ljóst að samgöngumál og skipulagsmál yrðu einnig stór átakamál.
Pétur gagnrýndi harðlega hugmyndir um að hætta við eða endurskoða samgöngusáttmálann.
„Það mun bara kosta meiri bið, meiri tafir, meiri umferð og meiri mengun,“ sagði hann.
Hann sagði sveitarfélögin á höfuðborgarsvæðinu og ríkið hafa komist að niðurstöðu um leiðina fram á við og að standa yrði við gerða samninga.
„Allt annað finnst mér fullkomlega óábyrgt.“
Segir Borgarlínu liðka fyrir einkabílnum
Pétur sagði Samfylkinguna standa með uppbyggingu Borgarlínu. Hann sagði kostnaðaráætlanir liggja fyrir og lagði áherslu á að verkefnið snerist ekki eingöngu um almenningssamgöngur heldur einnig um framkvæmdir fyrir bílaumferð.
Hann sagði rangt að halda því fram að verið væri að þvinga fólk úr einkabílum og inn í almenningssamgöngur. Ef byggðar yrðu hágæða almenningssamgöngur með sérakreinum og tíðum ferðum myndi fólk nota þær.
Pétur líkti þessu við uppbyggingu hjólastíga í Reykjavík. Árið 2006 hefðu engir sérstakir hjólastígar verið í borginni en nú væru þeir orðnir nærri 60 kílómetrar. Hann sagði fimm til tíu þúsund manns hjóla til og frá vinnu á hverjum degi.
„Eina leiðin til þess að liðka fyrir einkabílnum eru almenningssamgöngur og hjólreiðar,“ sagði hann.
Meira nýtt land verði brotið
Í skipulagsmálum sagði Pétur að þéttingarstefnan hefði verið áberandi um árabil en ekki væri mikið eftir af þéttingarreitum. Hann sagði stærstu fyrirhuguðu framkvæmdirnar vera austar í borginni, meðal annars austan við Úlfarsárdal og Grafarvog.
„Ég held að það verði þannig á næsta kjörtímabili að það verði meira brotið nýtt land,“ sagði hann.
Hann varði þó þéttingu byggðar og sagði mörg verkefni hafa tekist vel, meðal annars við Kirkjusand og Hverfisgötu. Valsreiturinn væri þó að hans mati „aðeins of stór“.
Pétur sagði þéttingu vestar í borginni geta dregið úr bílaumferð frá austari hverfum.
„Ef það er þétt vestar í borginni þá er minna af bílaumferð sem kemur hjá Árbænum og Grafarvogi, Grafarholti og Úlfarsárdal,“ sagði hann.
Útilokar engan eftir kosningar
Í lok viðtalsins var Pétur spurður út í mögulegt samstarf eftir kosningar, meðal annars í ljósi þess að Einar Þorsteinsson, oddviti Framsóknarflokksins, hefur útilokað samstarf við Samfylkinguna.
Pétur sagðist sjálfur ekki ætla að útiloka neinn.
„Málefnin verða að fá að stjórna,“ sagði hann.
Hann sagði þó mikinn mun vera á Samfylkingunni og flokkum hægra megin í borgarpólitíkinni, meðal annars í húsnæðis- og samgöngumálum.
„Það eru flokkar hægra megin sem ég þyrfti að hafa verulega fyrir því að koma inn á minn vagn,“ sagði Pétur.
Hann bætti þó við að pólitíska svarið væri einfalt:
„Ég geng óbundinn til kosninga.“
