Stefán sagði að tekjumódel FIFA hefði gjörbreyst á síðustu áratugum. Sambandið hafi áður verið „skítblankt alþjóðasamband“ sem lifði að mestu á félagsgjöldum, en með tilkomu stórra styrktarsamninga og sjónvarpstekna hafi heimsmeistaramótið orðið að lykiltekjulind.
„FIFA græðir og þjóðirnar sem eru nógu vitlausar til þess að taka að sér að halda heimsmeistaramót bera allan kostnaðinn.“
Að hans sögn þarf gestgjafaríkið að standa undir mannvirkjum, innviðum og öðrum útgjöldum, á meðan FIFA taki stærstan hluta tekna af mótinu.
Segja spillinguna hafa breyst
Valur sagði FIFA hafa tekið stjórnarhætti sína í gegn á pappír eftir fall Sepps Blatter og að sambandið kæmi jafnvel betur út en mörg önnur alþjóðasambönd í úttektum á góðum stjórnarháttum. Hann sagði það þó ekki breyta því að siðferðileg álitaefni væru áfram mörg og stór.
Stefán tók í sama streng og sagði spillinguna hafa færst til fremur en horfið. Áður hafi einstaka menn verið keyptir með beinum mútum, en nú fælist vandinn frekar í því hvernig FIFA héldi kerfinu gangandi með sífellt meiri tekjuöflun og pólitískum tengslum.
„FIFA er í rauninni eins og fíkill sem er langt leiddur í sinni fíkn,“ sagði Stefán.
Hann sagði að til að viðhalda stöðu forystunnar þyrfti sambandið stöðugan vöxt, meiri tekjur og fleiri leiðir til að láta peninga „sáldrast niður“ til aðildarsambandanna.
Miðaverð orðið óraunhæft
Valur sagði miðaverð á HM hafa tekið stóran kipp fyrir mótið í Bandaríkjunum og að almennir áhorfendur ættu sífellt erfiðara með að komast á leiki.
„Fyrir almennan fótboltaáhugamann þá er bara erfitt að fara á þessa leiki.“
Stefán sagði þessa þróun sérstaklega sýnilega þegar stórmót væru flutt inn á markaði þar sem fyrir væri hefð fyrir mjög háu miðaverði. Niðurstaðan væri einsleitari og efnameiri áhorfendahópur en áður.
Sífellt færri ríki geta haldið mótin
Stefán sagði sífellt meiri kröfur FIFA hafa leitt til þess að lýðræðisríki ættu erfiðara með að réttlæta kostnaðinn við að halda HM. Í staðinn yrðu ríki með mikla olíu- eða auðlindapeninga líklegri gestgjafar.
Hann nefndi sérstaklega Rússland, Katar og Sádi-Arabíu og sagði FIFA hafa lagað reglur sínar að því að tryggja ákveðnum ríkjum slík mót.
„Sá hópur ríkja sem í rauninni á möguleika á að halda mót verður alltaf ókræsilegri og ókræsilegri hópur.“
Undir lok viðtalsins var rætt hvort evrópsk knattspyrnusambönd myndu á einhverjum tímapunkti setja FIFA skorður. Stefán sagðist ekki bjartsýnn á að það gerðist vegna siðferðislegra ástæðna einna saman, heldur frekar ef FIFA færi að ógna tekjustoðum UEFA sjálfs.
Valur sagði þó athyglisvert að fylgjast með næstu forsetakosningu FIFA, þar sem Gianni Infantino hygst bjóða sig fram á ný. Þá muni meðal annars reyna á hvernig aðildarsambönd, þar á meðal KSÍ, stilli sér upp.
