„Þetta var með ótrúlegri dögum í maraþonsögunni,“ sagði Arnar í Reykjavík síðdegis á Bylgjunni.
Arnar sagði ekki aðeins sögulegt að Sawe hefði rofið tveggja tíma múrinn, heldur einnig að tveir hlauparar hefðu náð því í sama hlaupi. Kejelcha hljóp þar sitt fyrsta maraþon og endaði samt í öðru sæti á tíma sem áður hefði verið talinn óhugsandi.
„Það hlaupa tveir undir tveimur tímum og sá sem var í öðru sæti varað hlaupa sitt fyrsta maraþon. Þetta var alveg ótrúlegt,“ sagði Arnar.
Hann benti einnig á að þriðji maður í mark, Jacob Kiplimo frá Úganda, hefði hlaupið á 2:00:28, sem var einnig undir eldra heimsmeti Kelvins Kiptum frá Chicago árið 2023.
„Þetta er eiginlega óskiljanlegt,“ sagði Arnar.
Seinni helmingurinn á 59 mínútum
Að sögn Arnars var eitt það ótrúlegasta við hlaupið hvernig Sawe keyrði upp hraðann á seinni hlutanum. Hann fór fyrri helminginn á rúmum klukkutíma en hljóp þann síðari á 59 mínútum og einni sekúndu.
„Það er alveg fáránlegt að gera það í seinni hlutanum á maraþoni,“ sagði Arnar.
Hann sagði keppnina á milli fremstu manna hafa skipt miklu máli. Oft væri einn hlaupari orðinn aleinn síðustu tíu til tólf kílómetrana, en í London hefðu þrír af bestu maraþonhlaupurum heims þrýst hver á annan nánast allt hlaupið.
„Þeir eru að ýta hvor öðrum áfram og það skiptir alveg svakalega miklu máli til þess að þú náir öllu úr þér,“ sagði hann.
Heimsmet líka í kvennaflokki
Söguleg afrek voru einnig unnin í kvennaflokknum. Eþíópíska hlaupakonan Tigst Assefa sigraði á 2:15:41 og bætti eigið heimsmet í kvennakeppni þar sem konur hlaupa án karlkyns hraðastjóra. Kenýsku hlaupakonurnar Hellen Obiri og Joyciline Jepkosgei komu næstar í mark á 2:15:53 og 2:15:55. Þetta var í fyrsta sinn sem þrjár konur hlupu maraþon undir 2:16 í sama hlaupi.
Arnar sagði kvennahlaupið einnig hafa verið einstakt, þó að taktíkin þar hefði þróast öðruvísi en í karlahlaupinu.
„Í kvennahlaupinu hægist í rauninni á þeim seinni hlutann og þær eru líka þrjár saman þar,“ sagði hann og benti á að stundum gæti það dregið úr hraðanum þegar hlauparar færu að fylgjast of mikið hver með öðrum og vildu spara sig fyrir endasprettinn.
„Bilaður hraði“
Arnar setti hraðann í samhengi og sagði að metið karlamegin jafngilti því að hlaupa á um 21,2 kílómetra hraða á klukkustund á hlaupabretti — í rúma 42 kílómetra.
„Það er bara gjörsamlega bilað,“ sagði hann.
Hann sagðist sjálfur yrði mjög sáttur ef hann næði að halda slíkum hraða í þrjá til fjóra kílómetra.
„Þá ættirðu næstum því 40 kílómetra eftir og værir gjörsamlega út af,“ sagði Arnar og bætti við í léttum tón að líklega þyrfti tíu til þrettán Arnara Péturssyni til að skiptast á og keppa við einn hlaupara af þessu kaliberi.
Skórnir, næringin og atvinnumennskan skipta máli
Aðspurður hvort ný kynslóð hlaupaskóa hefði áhrif sagði Arnar að þróunin hefði verið mikil. Sérstaklega nefndi hann nýja froðu í keppnisskóm, sem skilaði meiri orku til baka í hverju skrefi, og karbónplötur sem hjálpuðu til við stöðugleika.
Hann sagði áhrifin ekki aðeins felast í því að fólk gæti hlaupið hraðar í keppni, heldur einnig í því að hlauparar gætu æft meira og af meiri ákefð.
„Þetta fer aðeins betur með lappirnar í æfingum,“ sagði hann.
Arnar sagði einnig að skórnir virtust hjálpa hlaupurum, sérstaklega á seinni hluta maraþons.
„Þú finnur minna fyrir þessum höggum í seinni hlutanum á hlaupinu,“ sagði hann.
Hann sagði næringuna einnig hafa breyst mikið síðustu ár. Fyrir tíu til fimmtán árum hefði verið mun algengara að hlauparar ættu í vandræðum með orkugel eða tækju inn of litla næringu. Nú væri mun meiri þekking á því hvernig ætti að næra sig á hlaupum án þess að maginn færi í uppnám.
Ráð við hlaupastingi
Í viðtalinu var Arnar einnig spurður út í hlaupasting. Hann sagði ekki vitað nákvæmlega hvað ylli honum en að ýmislegt gæti virkað til að losna við hann.
„Það sem hefur virkað fyrir marga er að sveifla hendinni, skiptast á að sveifla henni fram og aftur, kannski fimm til tíu hringi í aðra hvora áttina, þeim megin sem hlaupastingurinn er,“ sagði hann.
Hann bætti þó við að hugarfarið skipti líka miklu máli.
„Því minna sem þú nærð að hugsa um þetta, því líklegra er að hann hverfi,“ sagði Arnar og sagði það raunar eitt af lykilatriðum langhlaupa að vera í ákveðinni afneitun gagnvart því hversu erfitt verkefnið væri.
Stefnir á HM í 100 kílómetra hlaupi
Arnar ræddi einnig eigin hlaup, en hann hljóp nýverið 100 kílómetra hlaup þar sem brautin var aðeins 960 metrar. Hann þurfti því að hlaupa sama hringinn 105 sinnum.
Hann sagðist vissulega hafa hugsað á tímabili hvað hann væri eiginlega að gera en að það væri hluti af áskoruninni.
„Það sem mér finnst skemmtilegt í hlaupunum er að þú ert að skora alltaf á sjálfan þig,“ sagði Arnar.
Hann sagðist hafa bætt eigið Íslandsmet um rúmar 20 mínútur og væri nú spenntur fyrir mögulegu heimsmeistaramóti í 100 kílómetra hlaupi þann 20. september.
„Ef allt gengur upp er markmiðið að berjast um topp tíu sæti — eða jafnvel verðlaun,“ sagði Arnar að lokum.
