Einar var gestur í Reykjavík síðdegis á Bylgjunni þar sem rætt var um stöðu borgarmála, rekstur Reykjavíkurborgar, húsnæðismál, borgarlínu og mögulegt samstarf að kosningum loknum.
Tilefnið var meðal annars ársreikningur Reykjavíkurborgar, en í fram hefur komið að rekstrarniðurstaða A- og B-hluta væri jákvæð um átta milljarða króna, á meðan rekstur A-hluta væri neikvæður um ríflega fimm milljarða.
„Gríðarleg vonbrigði“
Einar sagði stöðuna vera mikil vonbrigði og rifjaði upp að þegar hann hefði tekið við fjármálum borgarinnar á kjörtímabilinu hefði hallinn verið 16,3 milljarðar króna.
„Við þurftum að eyða gríðarlegu púðri í það að ná niður þessum halla,“ sagði Einar og bætti við að þegar hann hefði skilað af sér borgarstjórastarfinu hefði reksturinn verið kominn réttum megin við núllið.
Að hans sögn hafi það náðst með því að skera niður í millilaginu, hagræða með skynsamlegum hætti og verja grunnþjónustuna.
„Ég var fyrsti borgarstjórinn í mörg, mörg ár til að skila borginni réttum megin við núllið,“ sagði hann.
Einar gagnrýndi núverandi meirihluta harðlega og sagði hann ekki hafa nægan áhuga á að reka borgina með aga og aðhaldi.
Brákarborg dæmi um óráðsíu
Einar nefndi Brákarborg sérstaklega sem dæmi um það sem hann kallaði rangar ákvarðanir og óráðsíu í rekstri borgarinnar. Hann sagði að húsið hefði verið ofmetið í reikningum borgarinnar þar sem síðar hefði þurft að ráðast í umfangsmiklar og kostnaðarsamar viðgerðir.
„Þetta er leikskólinn sem þeir ákváðu að breyta, ónýtu húsi í leikskóla, og þetta fór náttúrulega allt og endaði með tárum,“ sagði Einar.
Hann fullyrti að leikskólinn myndi líklega kosta þrjá og hálfan til tæpa fjóra milljarða króna fyrir um hundrað börn og sagði hægt að byggja fjóra leikskóla fyrir slíka fjármuni.
Vill fækka stöðugildum
Aðspurður hvað Framsókn myndi gera kæmist flokkurinn til valda sagði Einar fyrsta verkefnið vera að taka á hallarekstrinum.
Hann sagði „dauðafæri“ til að fækka stöðugildum hjá borginni og nefndi sérstaklega þjónustumiðstöðvar í hverfunum. Borgin væri nú með fjórar miðstöðvar, austur-, norður-, suður- og vesturmiðstöð, en Einar sagði sífellt færri íbúa sækja þangað þjónustu vegna aukinnar rafrænnar þjónustu.
Framsókn vill leggja þessar miðstöðvar niður og stofna í staðinn eina fjölskyldumiðstöð og aðra miðstöð fyrir þjónustu við heimilislausa, virkniþjónustu, hælisleitendur og fleiri hópa.
„Ef þú leggur niður fjórar starfsstöðvar og breytir þeim í tvær, þá getur þú fækkað ýmsum störfum,“ sagði Einar.
Hann sagði lykilatriði að pólitísk forysta væri fyrir því að ná árangri í rekstri.
Vill byggja „fyrir fólk“
Einar sagði Framsókn ætla að leggja áherslu á jafnvægi á húsnæðismarkaði og að byggja með skynsamlegri hætti fyrir þarfir fólks.
Hann gagnrýndi þéttingu byggðar undanfarinna ára og sagði víða vanta bílastæði, ljós og græn svæði. Hann sagði íbúðir sem verið væri að byggja ekki seljast nægilega vel og taldi það alvarlegt fyrir uppbyggingargeirann, verktaka og fólk sem þyrfti að flytja.
Einar nefndi Ártúnshöfða, Keldnaland og Úlfarsárdal sérstaklega og sagði skipulag þar þurfa að taka meira mið af þörfum fólks. Það væri eðlileg krafa að fólk gæti haft bílastæði við heimili sitt.
Hann gagnrýndi hugmyndir um bílastæðahús neðarlega í hverfum og tók Úlfarsárdal sem dæmi.
„Sjáið þið fyrir ykkur fjölskyldurnar leggja bílnum í bílastæðahúsi og rogast síðan með burðarpokana og börnin á bakinu í slagviðri í janúar úr einhverju bílastæðahúsi heim til sín?“ spurði Einar.
Vill breyta útfærslu Borgarlínu við Suðurlandsbraut
Í samgöngumálum sagði Einar að auðvitað þyrfti að bæta almenningssamgöngur og koma þeim í forgangsakreinar svo þær kæmust fram hjá umferðartöfum. Hann sagði hins vegar að útfærsla við Suðurlandsbraut gengi ekki upp.
Að hans mati þurfi að hlusta betur á fyrirtækjaeigendur, viðskiptavini og íbúa á svæðinu. Hann sagði fyrirtæki horfa fram á langt framkvæmdatímabil sem gæti haft veruleg áhrif á rekstur þeirra.
Einar sagði Framsókn standa á miðjunni í málinu. Að hans mati vilji Sjálfstæðisflokkur og Miðflokkur ganga of langt í að stöðva eða endurskoða verkefnið á meðan vinstri flokkarnir vilji ekki hlusta á gagnrýni.
Lausn Framsóknar við Suðurlandsbraut væri, að hans sögn, að endurskoða útfærsluna, taka annan hjólastíginn, þétta skipulagið og tryggja að einhver bílastæði haldist.
„Hlusta á íbúana, hlusta á fyrirtækjaeigendur,“ sagði Einar.
Útilokar Samfylkinguna
Aðspurður hvort hann útilokaði samstarf við Samfylkinguna eftir kosningar svaraði Einar játandi.
Hann sagðist hafa gert það þegar hann sprengdi meirihlutann á kjörtímabilinu og að það ætti því ekki að koma neinum á óvart.
„Við í Framsókn erum þeirrar skoðunar að Samfylkingin sé orðin hluti af vandamálinu,“ sagði Einar.
Hann sagði flokkinn orðinn samofinn kerfinu sem hann hefði sjálfur búið til og ófæran um að ráðast í nauðsynlegar breytingar. Hann sagði ekkert persónulegt liggja þar að baki, heldur væri einfaldlega kominn tími til breytinga.
Aðspurður hvort fleiri flokkar væru útilokaðir sagði hann svo ekki vera. Samstarf við aðra flokka myndi ráðast af málefnum.
Segist ekki hafa áhyggjur af könnunum
Einar var einnig spurður út í stöðu Framsóknar í könnunum en hann sagðist ekki hafa áhyggjur af henni.
Hann sagði kosningabaráttuna rétt að byrja af alvöru og að Framsóknarfólk væri „hresst og kátt“. Fram undan væru þrjár langar vikur í pólitík þar sem barist yrði um hugmyndir og framtíð borgarinnar.
„Við trúum því að almenningur sjái að það er mikilvægt að það sé flokkur í borgarstjórn sem talar fyrir miðjunni, talar fyrir skynseminni, að hlusta og mæta þörfum fólks,“ sagði Einar.
