Í Reykjavík síðdegis á Bylgjunni lýsti Finnur því hvernig hann hafi sjálfur keyrt suður yfir heiðar þrátt fyrir lokanir og upplifað aðstæður allt aðrar en gefið var til kynna. „Það var ekkert að veðri eða færð,“ sagði hann og taldi að myndin sem dregin var upp af aðstæðum hefði verið ýkt.
Í gær féllu niður skólar og starfsemi víða um land þegar veðrið gekk yfir. Finnur segir lokanir oft koma hratt til og gagnrýnir að þær séu ákveðnar of varfærnislega.
„Það er allt of fljótt verið að loka,“ sagði hann og bætti við að slíkar ákvarðanir ættu ekki endilega rætur í raunverulegum aðstæðum á vettvangi.
Hann bendir á að lokanir hafi veruleg áhrif á flutninga, sérstaklega fyrir landsbyggðina þar sem vöruflutningar og fiskútflutningur eru háðir greiðum samgöngum.
Vill að aðeins hluti ökutækja fái að fara
Finnur telur að í stað algjörra lokana ætti að heimila ákveðnum ökumönnum að fara um vegi, til dæmis reyndum bílstjórum og þeim sem sinna nauðsynlegum flutningum.
„Menn sem eru vanir að keyra í snjó, þeir eiga bara að fá að fara,“ sagði hann og lagði til að komið yrði á flokkunarkerfi eða stöðvunarpóstum þar sem slíkt væri metið.
Að hans mati sé núverandi fyrirkomulag of einfalt, þar sem allir séu settir undir sama hatt óháð reynslu eða aðstæðum.
Bendir á áhrif ferðamanna
Finnur telur að lokanir séu að hluta til tilkomnar vegna ferðamanna sem ekki séu vanir akstri í íslenskum vetraraðstæðum.
„Þetta er bara túristalokun,“ sagði hann og lýsti því hvernig óvanir ökumenn geti brugðist við litlu skyggni með því að stöðva ökutæki á miðjum vegi.
Hann telur þó að hægt væri að bregðast við því án þess að loka vegum fyrir alla.
Segir landsbyggðina einangraða
Finnur varar við því að umfangsmiklar lokanir geti einangrað landsbyggðina með neikvæðum afleiðingum. Hann segir að ákvarðanir séu teknar af fólki sem hafi ekki beina reynslu af aðstæðum á vettvangi.
„Það er bara svo létt að sitja bara einhvers staðar heima á bak við skjáinn og segja bara: ‚Það er bara lokað og þá er bara allt lokað,‘“ sagði hann.
Veðrið er ekki sambærilegt fyrri aðstæðum.
Finnur rifjaði upp aðstæður þegar hann ruddi sjálfur Öxnadalsheiði fyrir nokkrum árum í mun verra veðri þar sem tugir bíla komust leiðar sinnar í kjölfarið.
Að hans mati var veðrið í gær langt frá því að réttlæta sambærilegar lokanir. „Á bilinu einn til tíu þá var veðrið í gær svona tveir, en hitt veðrið svona tíu.“
Að lokum sagði hann að núverandi verklag þyrfti að endurskoða og sagði það alveg galið.
