„Eftir að rafmagnshjólin komu breyttist þetta umhverfi gríðarlega mikið. Allt í einu eru allir og amma þeirra komnir á hjól, ekki bara hjólanördarnir,“ segir Magni Hvamm, framkvæmdastjóri og stofnandi Icebike.
Að sögn Magna hefur fyrirtækið unnið að uppbyggingu hjólaleiða og innviða fyrir fjallahjólafólk í hátt í tvo áratugi.
Vilja gera hjólreiðar aðgengilegri fyrir alla
Magni segir markmiðið ekki aðeins að byggja nýjar leiðir heldur einnig að gera útivistina aðgengilegri fyrir fjölskyldur og almenning.
„Það eru svo margir farnir að hjóla núna og mikill skortur á upplýsingum um hvert á að fara og hvert á ekki að fara. Getustigið er líka mjög mismunandi hjá fólki,“ segir hann.
Unnið hefur verið að því að kortleggja leiðir, merkja þær betur og skapa svokölluð „Trail Center“ þar sem hjólafólk getur fengið upplýsingar um svæðið, leigt hjól, fengið sér kaffi og þrifið búnaðinn eftir ferð.
Reykjadalur orðinn hjólaparadís
Mest uppbygging hefur átt sér stað í nágrenni Hveragerðis þar sem gömlum kindastígum og þjóðleiðum hefur verið breytt í merktar hjólaleiðir.
„Við höfum verið að byggja upp í kringum Hveragerði, Reykjadal, Gufudal og Grensdal. Þar erum við að hreinsa upp gamlar leiðir, laga þær til og merkja,“ segir Magni.
Á svæðinu hafi nú verið útbúnar sérstakar hjólaleiðir sem séu allt að 30 til 40 kílómetrar að lengd og hannaðar með þarfir hjólafólks í huga.
„Þær eru með meira flæði og skemmtilegri til hjólreiða en hefðbundnar gönguleiðir. Við viljum ekki endilega vera á sömu leiðum og stærstu hópar göngufólks.“
Hægt að hjóla alla leið að Nesjavöllum
Fyrir þá sem vilja lengri ferðir segir Magni mögulegt að hjóla frá Reykjadal yfir að Nesjavöllum og áfram inn á Hengilssvæðið.
Icebike hefur meðal annars unnið með Orkuveitunni að tengingu hjólaleiða inn í Innstadal á Hengilssvæðinu.
„Þetta er rosalega fallegt svæði sem margir hafa aldrei skoðað. Það kemur fólki sífellt á óvart hversu mikil náttúrufegurð leynist þarna.“
Krakkar fá eigin æfingasvæði
Samhliða uppbyggingu stíga hefur verið lögð áhersla á að skapa örugg æfingasvæði fyrir börn og unglinga.
Slík svæði hafa meðal annars verið byggð í Gufunesi, á Akureyri og í samstarfi við íþróttafélagið Aftureldingu í Mosfellsbæ.
„Það hefur vantað svæði þar sem krakkar geta æft sig á stökkpöllum og tæknilegum hindrunum við öruggar aðstæður. Áhuginn hjá yngri kynslóðinni er gríðarlegur.“
Vara við utanvegaakstri og skemmdum á náttúru
Þrátt fyrir auknar vinsældir hjólreiða segir Magni mikilvægt að fólk sýni náttúrunni virðingu.
„Það eru svo margir farnir að hjóla núna og margir þekkja kannski ekki sögu fjallahjólamenningarinnar. Maður getur ekki bara farið hvert sem er. Það þarf að halda sig á stígum og gæta þess að skilja ekki eftir sig skemmdir.“
Hann telur að með markvissri uppbyggingu stíga megi bæði auka öryggi og draga úr álagi á viðkvæm náttúrusvæði.
Ferðamenn sækja í sérsniðnar hjólaferðir
Magni segir hjólaferðamennsku vera ört vaxandi grein á Íslandi. Fyrirtækið bjóði allt frá tveggja tíma hjólaleigu upp í átta daga sérsniðnar ferðir með gistingu, mat og leiðsögn.
„Túrisminn er orðinn miklu meira sérsniðinn. Fólk vill fá ferðir sem taka mið af getu, áhuga og því hvers konar upplifun það sækist eftir.“
Ferðir séu meðal annars í boði á hálendinu, á Vestfjörðum og víðar um land.
Hundruð kílómetra af stígum
Þegar Magni er spurður hversu mikið hafi verið lagt af hjólastígum í gegnum tíðina svarar hann að erfitt sé að nefna nákvæma tölu.
„Þetta eru einhverjir hundruð kílómetrar. Við höfum verið að þessu í átján ár og oft hefur þetta verið unnið með hrífum og skóflum af sjálfboðaliðum.“
Hann segir framtíðina bjarta og að nú sé unnið að því að fá sveitarfélög og stjórnvöld til að taka meiri þátt í uppbyggingu hjólainnviða.
„Þetta er að springa út núna. Áhuginn er gríðarlegur og sífellt fleiri uppgötva hvað hjólreiðar eru frábær leið til að njóta íslenskrar náttúru.“
