Samfylkingin verður stærsti flokkurinn í minnihluta á nýju kjörtímabili. Pétur sagði í Bítinu á Bylgjunni að hann hefði vissulega viljað vinna kosningarnar, en að það legðist vel í hann að takast nú á við hlutverk oddvita stærsta minnihlutaflokksins. Hann sagði jafnframt að mikilvægt væri að bæta andrúmsloftið í borgarstjórn og byggja upp meira traust til hennar.
Varar við töfum á samgöngusáttmálanum
Eitt af fyrstu stóru ágreiningsefnunum sem Pétur ræddi var samgöngusáttmálinn. Hann sagðist ekki mótfallinn samtali við ríkið og önnur sveitarfélög um fjármögnun og útfærslu, en varaði við því að opna sáttmálann aftur til endurskoðunar í heild.
Að hans mati gæti það kallað á nýjar tafir, þar sem öll sveitarfélögin á höfuðborgarsvæðinu myndu þá vilja endurraða áherslum sínum. Hann benti á að fyrri endurskoðun hefði þegar tafið verkefnið um tvö ár og sagði það vera ástæðuna fyrir því að ýmsar lykilframkvæmdir væru enn ekki komnar af stað.
Fjölgun ráða vekur spurningar
Pétur kom einnig inn á tillögur meirihlutans um að stofna ný ráð innan borgarkerfisins, þar á meðal leikskóla- og daggæsluráð, menningarráð og öldungaráð. Hann sagðist ekki ætla að setja sig upp á móti þessum ráðum sem slíkum, en benti á að það væri ákveðin þversögn í því að tala mikið um að skera fitu úr stjórnsýslunni og leggja síðan til að fjölga ráðum.
Hann sagðist þó fagna því að mannréttindamál héldu áfram að vera sýnileg í stjórnsýslu borgarinnar og nefndi sérstaklega að gott væri að menningin fengi skýrari sess en áður.
Segir borgina ekki hafa verið í „rugli“
Þá brást Pétur við ummælum Hildar Björnsdóttur, verðandi borgarstjóra, sem sagði í Morgunblaðinu að fólk vildi „þetta rugl burt“. Hann sagðist vona að nýr meirihluti hætti að tala með þeim hætti um Reykjavíkurborg.
Að hans mati hafi margt gengið vel á síðustu árum, þrátt fyrir eðlilega erfiðleika sem fylgi hraðri fjölgun íbúa og miklum vexti borgarinnar. Hann sagði Reykjavík vera í mikilli uppbyggingu og að verkefnin hefðu verið unnin með framtíðina í huga, ekki síst hvað varðaði þéttingu byggðar og samgöngur.
Þéttingin hafi ekki bara verið hugmyndafræði
Pétur sagði umræðuna um þéttingu byggðar oft verða of einfalda. Þetta væri ekki aðeins hugmyndafræðilegt val heldur líka praktísk stefna um hvernig ætti að byggja borg fyrir framtíðina. Hann benti á að ef þúsundir þeirra sem nú byggju á þéttingarsvæðum vestar í borginni hefðu í staðinn sest að austar, hefði morgunumferðin orðið enn þyngri en hún er í dag.
Að hans mati hafi líka þurft að horfa til þess hvað það kosti að reka dreifðari borg, hvort sem það snúi að sorphirðu, þjónustu eða samgöngum. Þar væri því um stóra stefnumótandi ákvörðun að ræða, ekki bara einstök byggingarmál.
Breytingar á fánareglum beinast gegn Palastínufán
Fánareglur borgarinnar voru meðal umdeildustu mála sem bar á góma. Pétur sagðist fagna því að íslenski fáninn yrði sýnilegur við byggingar borgarinnar, en hann teldi þó að raunverulegt pólitískt markmið breytinganna væri annað.
„Ég held að mjög mörg okkar líti svo á að þessar reglur séu svona aðeins gegn palestínska fánanum,“ sagði hann. Að hans mati væri breytingin fyrst og fremst hugsuð til að losna við þá umræðu og þau skilaboð sem Palestínufáninn hefði borið.
Hann sagðist skilja að fólk hefði ólíkar skoðanir á þessu, en benti á að fánar gætu líka verið tákn um samstöðu við fólk sem flýr stríð og ofbeldi. Hann nefndi bæði Palestínumenn og Úkraínumenn sem dæmi um hópa sem upplifðu slíkan stuðning sterkt þegar fáni heimalands þeirra sæist við opinberar byggingar.
Byrjar í skipulagsráði og borgarráði
Pétur sagði fyrsta verkefnið nú vera einfaldlega að kynnast starfseminni enn betur og hefja vinnuna af fullum krafti. Hann verður meðal annars í skipulagsráði og borgarráði og sagði ljóst að þar yrði tekist á um mörg stór og viðkvæm mál á næstu mánuðum.
