Að hans sögn bendir skýrslan til þess að ábatinn af sveigjanlegu gengi sé takmarkaður í íslensku hagkerfi. Ástæðan sé meðal annars sú að Ísland flytji nær allt inn og hafi því lítið svigrúm til að bregðast við gengisfalli með aukinni innlendri framleiðslu í stað innflutnings. Um leið séu stærstu útflutningsgreinarnar, eins og sjávarútvegur og álframleiðsla, ekki sérstaklega næmar fyrir gengisbreytingum með þeim hætti sem hefðbundin hagfræði geri ráð fyrir.
Krónan ýti undir verðbólgu og hærri vexti
Daði sagði niðurstöðuna líka þá að krónan hafi þann kostnað í för með sér að vextir á Íslandi séu viðvarandi hærri en í nágrannalöndunum. Það hafi áhrif víða, ekki síst á fjárfestingu og nýsköpun.
Að sögn Daða geta háir vextir gert það að verkum að góðar hugmyndir verða aldrei að raunverulegum verkefnum.
Fleiri veikleikar í hagkerfinu en gjaldmiðillinn
Í viðtalinu lagði Daði áherslu á að veikleikar í íslenska hagkerfinu væru ekki bundnir við gjaldmiðilinn einn. Þar nefndi hann sérstaklega vinnumarkaðinn og sagði að Íslendingar þyrftu að takast á við það mynstur sem hefði endurtekið leitt til launaskriðs, verðbólgu og óstöðugleika.
Að hans mati væri þó ekki um neina „sársaukafulla vegferð“ að ræða í sjálfu sér, heldur þyrfti fyrst og fremst traust og skýrari umgjörð. Þar sagði hann að annar gjaldmiðill gæti þjónað sem eins konar akkeri sem gerði erfiðara að leysa vanda með gengisfellingu eða öðrum skammtímalausnum.
Evran raunhæfasti kosturinn
Þegar rætt var um aðra gjaldmiðla sagði Daði að tæknilega væri ýmislegt mögulegt, þar á meðal einhliða upptaka annars gjaldmiðils, en hann teldi það hvorki auðvelda né góða leið fyrir Ísland. Að hans mati væri varanlegasti og hagkvæmasti kosturinn upptaka evru í gegnum aðild að Evrópusambandinu.
Hann tók þó fram að þjóðin væri nú aðeins að fara að kjósa um hvort hún vildi kanna þann möguleika nánar með aðildarviðræðum, ekki taka endanlega ákvörðun um upptöku evru. Sú spurning kæmi síðar, ef til þess kæmi, og þá gætu fleiri valkostir einnig komið til álita innan Evrópusambandsins, til dæmis sænska eða danska leiðin.
Örþjóð á jaðrinum
Daði sagði Ísland vera á mjög sérstökum stað sem örþjóð með eigin gjaldmiðil og að það væri í sjálfu sér ekki umdeilt í hagfræði að landið væri þar á jaðrinum.
Hann hafnaði því þó að ríkisstjórnin væri að gefast upp á stjórn efnahagsmála. Þvert á móti sagði hann markmiðið að nýta öll þau tæki sem væru í boði, en um leið horfast í augu við að Ísland bæri viðbótarkostnað af núverandi fyrirkomulagi sem ekki væri nauðsynlegt að halda í ef þjóðin vildi fara aðra leið.
Vill halda í það sem hefur tekist vel
Þrátt fyrir gagnrýni á krónuna sagði Daði að Ísland stæði á mörgum sviðum mjög vel. Hann nefndi sérstaklega að laun hér á landi væru há og launajöfnuður með því besta sem gerist í heiminum. Að hans mati væri verkefnið því ekki að kollvarpa því sem vel hefur tekist, heldur tryggja að hægt sé að verja þá stöðu og bæta hana til framtíðar.
