„Maskína var mjög nálægt úrslitum og við vorum eitt prósent að meðaltali frá niðurstöðu kosninga. En þær eru ekki kosningar,“ sagði Þóra.
Mesta frávikið hjá Maskínu var í fylgi Miðflokksins í Reykjavík, sem mældist of lágt um 2,8 prósentustig. Hún benti jafnframt á að Gallup hefði líka verið nærri niðurstöðum, þó þar hefðu önnur frávik verið mest áberandi.
Getur breyst fram á kjördag
Þóra sagði að niðurstöður kannana gætu alltaf tekið breytingum alveg fram á kjördag, enda væru margir kjósendur enn að gera upp hug sinn á lokametrunum.
„Samkvæmt íslensku kosningarannsókninni eru um 20 prósent sem taka ákvörðun á kjördag,“ sagði hún og benti á að það eitt gæti haft veruleg áhrif þegar mjótt væri á munum milli flokka.
Hún sagði einnig að stundum gæti verið erfiðara að ná til ákveðinna kjósendahópa en annarra og að það gæti skýrt hluta af þeim frávikum sem sæjust stundum í könnunum.
Í viðtalinu kom fram að könnunarvinna hefði breyst mikið á undanförnum árum. Nú dygði ekki einfaldlega að safna svörum, heldur þyrfti að vigta niðurstöður eftir ýmsum bakgrunnsþáttum svo úrtakið endurspeglaði kjósendur sem best.
„Núna þurfum við að vigta því við náum síður í ákveðna hópa heldur en aðra,“ sagði Þóra og nefndi að meðal annars væri horft til kyns, aldurs, búsetu og menntunar.
Hún sagði jafnframt mikilvægt að rugla ekki saman vísindalegum skoðanakönnunum og sjálfvöldum netkönnunum, þar sem fólk ákveður sjálft hvort það taki þátt eða ekki.
Pólitíkusar glaðir og gramir
Þóra sagði stjórnmálafólk oft bregðast við könnunum eftir því hvort niðurstöðurnar væru þeim hagfelldar eða ekki.
„Þeir eru brjálaðir þegar þeir fá slæmar og svo hampa þeir okkur þegar þeir fá góðar,“ sagði hún.
Að hennar mati sýndi kosninganóttin í Reykjavík þó að kannanirnar hefðu almennt gefið nokkuð rétta mynd af stöðunni, jafnvel þótt frávik hefðu verið á einstökum stöðum.
