Níu oddvitar mæta í kappræðurnar í kvöld, en valið byggir á kosningaspá Vísis og könnunum sem sýna hvaða framboð eiga raunhæfa möguleika á manni inn.
Já-nei spjöld þegar umræðan fer út í skurð
Sunna sagði að þótt grunnformið yrði kunnuglegt yrði líka gripið til nýrra leiða til að halda umræðunni skýrri.
„Við ætlum að grípa til leiða til þess að fá skýra afstöðu frá frambjóðendum þegar okkur finnst umræða kannski komin út í skurð eða orðin að einhverju pólitísku blaðri.“
Oddvitarnir verða meðal annars með já-nei spjöld sem hægt verður að grípa til þegar kalla þarf eftir afdráttarlausri afstöðu.
Samgöngur, borgarlína og breytingar
Að sögn Sunnu hafa samgöngumál, borgarlínan, bílastæðamál og þétting byggðar verið áberandi í þessari kosningabaráttu. Þá verði leikskólamálin einnig til umræðu.
Elísabet sagði jafnframt að eitt af því sem stæði upp úr í ár væri að nær allir flokkar væru að boða breytingar með einum eða öðrum hætti. Markmiðið í kvöld væri meðal annars að fá betur fram hvað sú breyting þýddi í raun.
Uppgjör við kjörtímabilið á léttari nótum
Í upphafi þáttar verður litið yfir farinn veg. Sunna sagði að þar yrði farið yfir síðustu fjögur ár í borginni, þar sem ýmislegt hefði gengið á.
Þær sögðu að farið yrði yfir helstu vendingar kjörtímabilsins, þar á meðal mannabreytingar og stóladans í borgarkerfinu, en á léttari nótum en þó með skýrum hætti.
Þá verða einnig sýnd sérstök innslög þar sem Bjarki Sigurðsson tók oddvitana tali í eins konar atvinnuviðtölum.
Hugmyndin er sú að oddvitarnir séu í raun að sækja um starf hjá kjósendum og með þessu fáist aðeins mannlegri mynd af fólkinu á bak við framboðin.
Ný könnun birt í beinni
Elísabet og Sunna staðfestu einnig að í kvöld yrði birt ný og síðasta könnun Maskínu fyrir kjördag.
Þær sögðu bæði að þar væru tíðindi og að niðurstöðurnar gætu gefið kappræðunum aukið vægi, ekki síst þar sem stór hluti kjósenda væri enn óákveðinn.
Kappræðurnar verða í beinni útsendingu á Sýn og Vísi í kvöld klukkan 19:30.
