Halldór er áhugamaður um borgarskipulag og sérfræðingur í samstarfi, hefur sett upp vefinn sjavarthorpid.com þar sem hann kynnir hugmynd að nýju sjávarþorpi í Skerjafirði.
Í samtali við Reykjavík síðdegis á Bylgjunni sagði Halldór að hugmyndin væri ekki fullmótuð tillaga heldur innlegg í umræðu um húsnæðismál, samgöngur og langtímahugsun í skipulagi höfuðborgarinnar.
„Við þurfum að geta leyft okkur að hugsa stórt,“ sagði Halldór.
Byggt á landfyllingu í Skerjafirði
Hugmyndin gerir ráð fyrir landfyllingu við Skerjafjörð, meðal annars í grennd við Löngusker og Hólma, þar sem grunnt er. Halldór bendir á að stórar framkvæmdir séu fram undan í Reykjavík, meðal annars við að setja Miklubraut og Hringbraut í stokk, og að efni úr slíkum framkvæmdum þurfi að fara einhvers staðar.
Hann segir að hægt væri að nýta það efni til landfyllingar, líkt og gert hafi verið í ýmsum borgum erlendis.
Halldór nefnir sérstaklega Kaupmannahöfn sem fyrirmynd, þar sem unnið er að stórri landfyllingu við Lynetteholm. Hann segir Danmörku hafa sýnt hvernig hægt sé að hugsa borgarskipulag til langs tíma og fela slíkar framkvæmdir sérstökum rekstraraðila sem sé ekki bundinn af skammtímasveiflum stjórnmálanna.
Flugvöllurinn lykilatriði í framtíðarsýninni
Hugmyndin byggir á því að Reykjavíkurflugvöllur fari að lokum úr Vatnsmýrinni. Halldór leggur þó áherslu á að málið þurfi að ræða af yfirvegun.
Hann segir að flugvöllurinn hafi gegnt mikilvægu hlutverki og að sterkar tilfinningar tengist honum. Á vefnum sé sérstök greinargerð um flugvöllinn, sjúkraflug og mögulegar lausnir til framtíðar.
Halldór nefnir Berlín sem dæmi um borg þar sem flugvöllum hafi verið lokað og önnur úrræði tekin við. Hann bendir einnig á að þyrlupallur verði við Landspítalann, sem skipti máli í umræðu um sjúkraflug.
„Ég ætla ekki að tala illa um flugvöllinn. Hann er búinn að gagnast mjög vel. Ég segi bara að við skulum ræða þetta án þess að láta tilfinningarnar fara með okkur í gönur,“ sagði hann.
37 þúsund íbúðir og 1.100 bátapláss
Samkvæmt hugmyndinni yrði svæðið um 427 hektarar. Þar væri gert ráð fyrir allt að 37 þúsund íbúðum og bátaplássum fyrir um 1.100 báta.
Halldór segir framkvæmdina ekki vera skammtímaverkefni heldur langtímaverkefni til 30, 40 eða jafnvel 50 ára. Hann nefndi að horfa mætti til ársins 2060 eða lengra.
Á svæðinu væri hægt að gera ráð fyrir skólum, samgöngutengingum, Borgarlínu, baðlóni, náttúrusvæðum og annarri þjónustu.
„Þetta er alvöru stórhugsun,“ sagði Halldór.
Segir skammtímahugsun skapa húsnæðis- og umferðarvanda
Halldór gagnrýnir það sem hann telur vera of mikla skammtímahugsun í íslensku borgarskipulagi. Hann segir að húsnæðisvandinn og umferðarvandinn séu að hluta til afleiðing þess að ekki hafi verið hugsað nógu langt fram í tímann.
Hann segir að minni uppbyggingarverkefni geti verið gagnleg til skamms tíma en þau leysi ekki stóru vandamálin.
„Við getum ekki byggt borgarsamfélag á mottóinu: Þetta reddast. Þá vitum við að við verðum alltaf að slökkva elda og sjá bara ekki fram úr reyknum,“ sagði Halldór.
Vill að stjórnmálin ræði framtíðina
Halldór segir hugmyndina ekki vera flokkapólitíska en telur að stjórnmálamenn eigi að ræða hana. Hann hafi lítillega rætt við frambjóðendur í borginni en markmiðið sé fyrst og fremst að kasta boltanum út í samfélagið.
Hann segir að spurningin snúist ekki eingöngu um hvort loka eigi flugvellinum, heldur hvernig borgin ætli að leysa húsnæðisþörf, samgöngur og skipulag í kringum stóra þjónustukjarna á borð við háskóla, Landspítalann og stjórnkerfið.
„Mér finnst pólitíkin mega alveg ræða þetta, ekki endilega hvort það eigi að loka flugvellinum, heldur hvernig ætlarðu að framkvæma þetta til langs tíma,“ sagði Halldór.
Þekkir Skerjafjörðinn frá barnæsku
Halldór segist þekkja Skerjafjörðinn vel og hafa byrjað að sigla þar úti á skerjunum fyrir um hálfri öld. Hann hafi lengi notið svæðisins og segir hugmyndina meðal annars spretta af tengslum hans við hafið, útivist og siglingar.
Hann segir jafnframt að vefurinn hafi þróast hratt með endurgjöf frá fólki sem hafi komið með hugmyndir að því hverju mætti bæta við.
„Ég held að við eigum að vinna hlutina þannig. Við fáum endurgjöf, við förum ekki í vörn, við verðum bara að leysa málin,“ sagði Halldór.
