Hann segir um raunverulegar greiðslur að ræða og fullyrðir að upphæðin muni renna til Íslands, þótt endanleg krónutala kunni að verða lítillega frábrugðin.
Umræðan hefur blossað upp eftir að Indriði H. Þorláksson, fyrrverandi ríkisskattstjóri, fjallaði um málið í grein í Heimildinni. Þar var dregin upp sú mynd að ekki væri um viðskipti tveggja óháðra aðila að ræða heldur tilfærslu eigna milli tengdra félaga innan sömu samstæðu.
Í Reykjavík síðdegis á Bylgjunni sagði Guðmundur Fertram að sú lýsing væri að vissu leyti rétt, en að hún breytti ekki því að tilfærslan hefði verulegan fjárhagslegan ávinning í för með sér fyrir Ísland.
„Raunin er engu að síður sú að þessi millifærsla kemur til með að kosta Coloplast á Íslandi um 40 milljarða,“ sagði hann.
Segir söluna hafa skilað miklum verðmætum
Guðmundur Fertram rifjaði upp að Kerecis hefði verið selt fyrir 175 milljarða króna og að andvirðið hefði runnið til hluthafa félagsins. Þar að auki hefðu 5,5 milljarðar runnið til um 400 starfsmanna Kerecis í gegnum kauprétt.
Að hans sögn skiptir máli hvernig slíku fjármagni er ráðstafað eftir á. Hann sagði starfsmenn og aðra eigendur nú geta endurfjárfest fjármuni sína í nýrri tækni og nýjum fyrirtækjum án þess að skattar leggist á við hvert einasta skref, svo lengi sem fjármunirnir séu ekki teknir út til einkaneyslu.
Hann sagði gagnrýni Indriða í grunninn snúast um hugmyndafræðilegan ágreining um það hvort slíkt fjármagn eigi fremur að vera í höndum einstaklinga og fjárfesta eða ríkisins.
„Þetta er svona grundvallarmunur sósíalisma versus einhvers konar kapítalisma,“ sagði Guðmundur Fertram.
Vísar til reglna um milliverðlagningu
Guðmundur sagði jafnframt að ekki væri unnt að flytja eignir úr íslenska félaginu til Danmerkur án þess að reglur um milliverðlagningu tækju gildi. Hann nefndi þar sem dæmi alþjóðleg viðskipti innan fyrirtækjasamsteypa, þar sem verðlagning milli tengdra aðila sæti sérstökum reglum.
Að hans sögn felst gagnrýni Indriða í því að um sé að ræða tilfærslu milli „tveggja vasa sama aðila“ en hann lagði áherslu á að slík tilfærsla hefði engu að síður bein áhrif hér á landi.
Guðmundur Fertram sagði upphæðina sem nefnd hefur verið, um 40 milljarða króna, vera „alvöru cash tölu“ sem renna ætti í ríkissjóð í haust og bætti við að þótt móðurfélagið í Danmörku kynni að geta dregið kostnaðinn frá skatti þar, væri um reiðufé að ræða fyrir Ísland.
„Fyrir Íslendinga og okkur þá er þetta bara reiðufé,“ sagði hann.
Segir upphæðina geta orðið aðeins hærri eða lægri
Spurður hvort Íslendingar gætu gengið út frá því að umræddir 40 milljarðar myndu sannarlega skila sér í ríkissjóð svaraði Guðmundur Fertram því játandi, þó með þeim fyrirvara að endanleg upphæð kynni að verða ekki nákvæmlega sú sama.
„Ég held að verðið sé ekki nákvæmlega hver hún er upp á krónutölu, hún gæti verið aðeins hærri, aðeins lægri,“ sagði hann og vísaði jafnframt til þess að fjármálaráðherra og þingmenn úr bæði stjórnarliði og stjórnarandstöðu hefðu tjáð sig á svipuðum nótum.
Að hans mati beri því að lesa grein Indriða fyrst og fremst sem gagnrýni á það hvernig verðmætin dreifast, frekar en á það hvort greiðslan sjálf muni eiga sér stað.
Segir skattinn koma þegar fjármunir eru teknir út
Guðmundur Fertram lýsti því jafnframt að í íslensku rekstrarumhverfi væri almennt þannig háttað að þegar eignarhaldsfélög seldu eignir og endurfjárfestu andvirðið innan félagsins legðist skattur ekki á við sjálfa endurfjárfestinguna. Skatturinn kæmi fyrst þegar fjármunir væru teknir út til einkaneyslu, svo sem til bifreiðakaupa eða ferðalaga.
Hann sagði þetta vera grundvallarforsendu þess að fjármunir gætu flætt áfram milli verkefna og að fjárfestar gætu tekið áhættu, selt eignir, keypt nýjar og byggt þannig upp ný verðmæti.
Að hans mati væri Indriði ósáttur við einmitt þetta fyrirkomulag og vildi sjá skattlagningu á fleiri stigum virðiskeðjunnar.
Kaffiboð þegar milljarðarnir verða millifærðir
Í lok viðtalsins sagðist Guðmundur Fertram ætla að fylgja máli sínu eftir með táknrænum hætti þegar þar að kemur. Hann sagðist þegar hafa náð í símanúmer Indriða og hygðist bjóða fyrrverandi ríkisskattstjóranum í kaffi þegar greiðslan færi fram.
„Ég ætla bara að bjóða honum kaffi þegar ég ýti á millifærslutakkann í október,“ sagði Guðmundur Fertram.
