Í viðtali í Reykjavík síðdegis á Bylgjunni sagði Björn að lögregla hefði veitt ökumönnum svigrúm fram til 25. þessa mánaðar til að losa sig við nagladekk, en nú færi tíminn að renna út.
„Það fer að styttast í það að fólk þurfi að vera komið á að minnsta kosti sumardekkin eða naglalaus dekk,“ sagði hann.
Slæm hjólastilling getur eyðilagt dekk
Björn sagði marga ökumenn líta fyrst og fremst til þess að skipta um dekk, en minna sé hugað að því hvernig dekkin slitni. Þar geti hjólastilling skipt miklu máli.
Ef bíll sé ekki rétt stilltur geti dekkin slitnað mjög ójafnt, ýmist að innan eða utan, og í verstu tilfellum eyðilagst á skömmum tíma. Hann hvatti ökumenn til að skoða mynstur og slit á dekkjum reglulega, að minnsta kosti tvisvar á ári.
„Þú getur eyðilagt dekkin bara á nokkur hundruð kílómetrum ef hann er rammskakkur í hjólastillingu,“ sagði Björn.
Að hans sögn eru bílar í dag þyngri en áður og álag á hjólabúnað meira, sem geri það að verkum að hjólastilling þurfi oftar en áður að vera til skoðunar.
Dýr dekk oft betri fjárfesting en þau ódýrustu
Björn sagði dekk geta verið mjög mismunandi að gæðum og að verðið endurspeglaði það oft að einhverju leyti. Hann kvaðst ekki mæla með því að fólk færi sjálfkrafa í allra ódýrustu kostina, sérstaklega ef um væri að ræða lítt þekkt merki.
Að sögn hans geti munað mörgum metrum á hemlunarvegalengd milli vandaðra og ódýrari dekkja, sérstaklega í rigningu eða bleytu. Þar sé verið að tala um öryggisatriði sem geti ráðið úrslitum þegar skyndilega þurfi að bregðast við.
„Þetta getur skipt öllu máli þegar þú ert að bremsa bílinn niður, til dæmis sérstaklega í rigningu,“ sagði hann.
Hann benti jafnframt á að dekk væru einn mikilvægasti öryggisþáttur hvers bíls, enda væru þau eini snertiflötur ökutækisins við veginn.
Upplýsingar aðgengilegri en áður
Björn sagði aðgengi að upplýsingum um dekk hafa batnað á undanförnum árum. Ný dekk væru merkt upplýsingamiðum þar sem fram kæmu einkunnir fyrir meðal annars grip í bleytu, hávaða og orkunýtingu.
Þessar upplýsingar skiptu sífellt meira máli, ekki síst fyrir eigendur rafbíla, þar sem mismunandi dekk gætu haft merkjanleg áhrif á orkunotkun. Að hans sögn gæti val á dekkjum munað allt að sjö til átta prósentum í eyðslu, hvort sem um væri að ræða rafmagn eða eldsneyti.
Hann benti einnig á að á netinu mætti finna ítarlegar prófanir á einstökum dekkjategundum, þar sem bornir væru saman þættir á borð við hemlunarvegalengd, aksturseiginleika í bleytu og hávaða.
Heilsársdekk henta ekki öllum aðstæðum
Spurður um heilsársdekk sagði Björn að þau væru málamiðlun sem gæfi aðeins meðalárangur bæði að sumri og vetri. Slík dekk gætu hentað við vægari aðstæður, en væru ekki endilega besti kosturinn fyrir íslenskan vetur, sérstaklega utan þéttbýlis.
Hann sagði mörg heilsársdekk í raun fremur sniðin að miðevrópskum aðstæðum þar sem búast mætti við vægri ísingu og litlum snjó. Þá gætu ónegld vetrardekk, sem stundum væru notuð sem heilsársdekk, reynst afar illa þegar veghiti hækkar.
„Á góðum sólardegi þá er veghitinn kannski kominn upp í 40 gráðu hita. Þá er þetta bara eins og tyggjó,“ sagði hann.
Varadekkið hverfur úr nýjum bílum
Björn vakti einnig athygli á því að varadekk væru sífelld sjaldgæfari í nýjum bílum. Framleiðendur velji í staðinn oft að láta fylgja með loftdælu og viðgerðarkvoðu eða froðukitt, sem geti dugað við smærri göt.
Slíkar lausnir dugi hins vegar skammt ef dekkið springur illa og þá sé oftar en ekki ekki um annað að ræða en að kalla til flutningabíl með tilheyrandi kostnaði.
Ódýrari dekk að utan
Að lokum sagði Björn að fleiri ökumenn væru farnir að skoða þann kost að panta dekk erlendis frá. Þar gæti stundum verið um lægra verð að ræða en á móti kæmi biðtími sem gæti numið nokkrum vikum. Þá þyrfti einnig að finna þjónustu hér heima til að umfelga dekkin.
Hann taldi þessa þróun líklega auka þrýsting á innlenda seljendur að bjóða samkeppnishæfara verð.
„Maður þarf að taka upplýsta ákvörðun um dekkjaval. Þetta er sá þáttur sem við getum haft mest áhrif á varðandi öryggi bílsins,“ sagði Björn Kristjánsson.
