Að sögn Árna var byrjað að bora á laugardag.
„Já, það var byrjað á laugardaginn og fyrst einhverja sex metra og svo níu. Þannig að við erum komin fimmtán metra niður.“
Hann sagði verkið hafa gengið sérstaklega vel hingað til, þótt alltaf gætu komið upp áskoranir í slíkum borunum.
Fast berg lykilatriði
Árni sagði að markmiðið væri að bora um þrjú hundruð metra niður til að taka sýni. Sams konar rannsóknir þurfi einnig að fara fram í Landeyjasandi, þar sem boranir geti reynst flóknari vegna sandsins.
Að hans sögn skiptir mestu máli að komast í fast berg. Ef mikið reynist um setlög þarf að meta hversu þétt þau eru, því laus lög geta þýtt meiri leka og gert göngin dýrari.
Auk boranna á landi og í Eyjum verður einnig farið yfir hafsvæðið með búnaði sem sendir bylgjur niður á fyrirhugaða gangaleið og mælir þannig betur hvernig botninn og lögin undir honum eru.
Niðurstöður gætu legið fyrir í haust
Árni sagði að þegar þessar fyrstu rannsóknir liggi fyrir verði hægt að meta verkefnið betur, vonandi í haust eða undir vetur.
Að hans sögn er stóra spurningin ekki hvort tæknilega sé hægt að ráðast í göngin, heldur hvað þau muni kosta. Nú sé kostnaðarbilið mjög breitt, frá fimmtíu upp í hundrað og fimmtíu milljarða króna.
Hann sagði tilgang rannsóknanna meðal annars vera að þrengja það bil svo hægt verði að leggja raunhæfara mat á verkefnið.
Segir göngin geta styrkt allt svæðið
Árni sagði að áhrifin yrðu ekki bara fyrir Vestmannaeyjar heldur líka fyrir samfélögin á meginlandinu. Hann sagði að horfa þyrfti á Eyjar og nærliggjandi svæði sem eitt samfélag.
Að hans mati gætu göngin breytt miklu fyrir atvinnulíf, samgöngur og tengingar milli byggðarlaga. Hann nefndi einnig að svæðið á landi og í Eyjum væri samanlagt á stærð við allt Austurland, sem sýndi hversu mikið væri undir.
Framhaldið ræðst af rannsóknum
Ef niðurstöður rannsóknanna verða jákvæðar sagði Árni næsta skref vera að leita frekari fjármögnunar. Hann lagði áherslu á að um einkaframkvæmd væri að ræða og að ekki væri verið að kalla eftir því að verkefnið tæki fé frá hefðbundnum vegaframkvæmdum ríkisins.
Hann sagði að ef rannsóknir sýndu að verkefnið væri raunhæft yrði einfaldlega haldið áfram.
