Hrönn, sem er tannlæknir hjá Brosinu í Kópavogi, ræddi málið í Reykjavík síðdegis á Bylgjunni. Þar sagði hún tannverndarvikuna vera gott tækifæri til að staldra við og meta stöðuna í eigin munnholi.
„Get ég gert eitthvað betur, hvernig er staðan á mínu munnholi?“ sagði hún og benti á að áherslur í tannhirðu hefðu breyst á undanförnum árum.
Sífellt meiri áhersla á slit
Hrönn sagði að á síðari tímum væri fólk í auknum mæli að eldast með eigin tennur, ólíkt því sem áður var þegar tannmissir varð algengari. Því skipti nú meira máli en áður að huga að sliti á tönnum.
Að hennar sögn geta bæði tannbursti og tannkrem haft áhrif á slíkt slit. Hún sagði mikilvægt að fólk notaði ekki of harðan tannbursta eða burstaði of fast, enda gæti það aukið slit hraðar en æskilegt væri.
„Núna skiptir slit orðið svo miklu meira máli,“ sagði hún.
Spurð um val á tannbursta sagði Hrönn að í dag væri almennt mælt með mjúkum burstum, jafnvel mjög mjúkum.
„Við erum mjög gjarnan farin að tala bara um extra soft bursta í dag, alla vega soft,“ sagði hún.
Hvetur fólk til að hugsa út fyrir tannþráðinn
Í þættinum kom einnig fram að tannþráður væri mikilvægur en Hrönn benti jafnframt á að hann hentaði ekki alltaf einn og sér, sérstaklega eftir því sem fólk eldist.
Hún sagði að með aldrinum gæti bil milli tanna aukist, meðal annars vegna þess að bein hörfaði. Við slíkar aðstæður gætu millitannaburstar reynst gagnlegir til að hreinsa betur á milli tanna.
„Þá er tannþráðurinn kannski stundum svolítið mjór og þá er gott að vera með millitannabursta til að hreinsa vel þar á milli,“ sagði hún.
Hrönn sagði jafnframt að Íslendingar hefðu áður fyrr frekar misst tennur vegna tannskemmda en nú væri beineyðing orðin stærri áhrifaþáttur hjá mörgum.
Tannholdsbólga og aldur geti haft áhrif
Hrönn sagði beineyðingu meðal annars geta tengst aldri og tannholdsbólgum. Hún lagði áherslu á að góð hreinsun skipti þar miklu máli, enda gæti bólga í tannholdi haft víðtækari áhrif en margir gerðu sér grein fyrir.
Að hennar sögn verður tannhold gegndræpara fyrir bakteríum þegar bólga er til staðar og því sé mikið í húfi að viðhalda góðri munnheilsu.
Hún sagði einnig að fólk með hörfað bein eða berar tannrætur þyrfti að gæta sérstaklega að því að nota ekki of harðan bursta eða gróft tannkrem, þar sem slíkt gæti aukið slit enn frekar.
Segir hýdroxýapatít-tannkrem verða algengari
Þá var Hrönn spurð út í tannkrem og hvort flúor væri enn besta leiðin til að fyrirbyggja tannskemmdir. Hún sagði flúor vissulega gera tennur sýruþolnari, en bætti við að sjónir beindust nú í auknum mæli að tannkremum með hýdroxýapatíti.
Að hennar sögn hefðu rannsóknir sýnt að slík tannkrem gætu haft sambærileg áhrif og flúor þegar kæmi að tannskemmdum.
„Í dag getur maður meira mælt með því að rannsóknir hafi sýnt að það hefur sömu áhrif,“ sagði hún.
Hrönn sagði þó að ekki væri eitt og hið sama sem hentaði öllum og að þörf fólks gæti verið mismunandi eftir aðstæðum.
Tungan oft vanrækt í daglegri rútínu
Ein af þeim áherslum sem Hrönn nefndi sérstaklega var hreinsun tungunnar. Hún sagði mikið af bakteríum safnast á tunguna og taldi æskilegt að fólk byrjaði jafnvel munnhirðurútínu sína á því að skafa hana.
„Þú átt helst að byrja þína munnrútínu á að skafa tunguna,“ sagði hún.
Til þess mætti nota sérstaka tungusköfu eða einfaldlega tannbursta. Hún taldi líklegt að margir vanræktu einmitt þennan þátt í munnhirðunni.
Aðspurð um munnskol sagðist Hrönn sjálf ekki nota Listerine og kvaðst frekar horfa til annarra leiða, meðal annars taflna sem ætlaðar væru til að hafa áhrif á bakteríuflóruna í munni. Hún sagði ekki endilega æskilegt að drepa allar bakteríur í munnholi, þar sem sumar þeirra væru gagnlegar.
Aðalmálið er að skoða eigin venjur.
Hrönn segir enga eina séráherslu vera í tannverndarvikunni umfram aðra aðra en almenna munnheilsu og að fólk tæki eigin venjur til skoðunar. Hún nefndi þar meðal annars að margir gætu bætt tunguhreinsun inn í daglega rútínu og endurmetið hvort verið væri að nota rétta tannbursta, tannkrem eða vörur til að hreinsa á milli tanna.
