Kjartan Páll Sveinsson, formaður Landssambands smábátaeigenda, sagði í Bítinu í gær að stórútgerðin væri búin að planta lykilmönnum hér og þar í stjórnkerfinu. Þar vísaði hann meðal annars til þess sem hann taldi slagsíðu gagnvart smábátum innan stjórnkerfisins.
Guðmundur vísaði þeim málflutningi á bug og sagði ekki hægt að ætlast til þess að fólk sem hefði starfað í einkageiranum gæti síðar ekki tekið störf hjá hinu opinbera.
Hann nefndi sérstaklega forstjóra Hafrannsóknastofnunar í því samhengi og sagði hann „bara traustan og góðan mann“ sem hefði tekið þátt í samfélaginu á mörgum sviðum.
Segir smábátakerfið oft verið endurskoðað
Guðmundur sagði umræðuna um smábáta og strandveiðar ekki nýja af nálinni. Hann sagði samkomulag hafa verið gert við trillukarla á um það bil tíu ára fresti síðustu fjóra áratugi og að nú væri verið að vinna með fimmta kerfið frá því á níunda áratugnum.
Að hans mati liggur vandinn meðal annars í því að þegar frjáls aðgangur er að veiðum fjölgi bátum, en kvótinn stækki ekki að sama skapi.
„Alltaf þegar þú ert með frjálsar veiðar, þá þýðir það að ef það gengur vel þá vilja fleiri fara inn og þá er ekki til nægur kvóti fyrir alla.“
Hann sagðist ekki vera andvígur smábátum sem slíkum og kallaði trillukarla „flotta menn“, en sagði að strandveiðar ættu að vera innan skýrra marka, með ákveðnum kvóta, fjórum veiðidögum í viku og stopp þegar potturinn tæmist.
Vill ekki að strandveiðar fái alla byggðapotta
Guðmundur sagði ríkið þegar hafa umtalsverðan kvóta til ráðstöfunar og að Alþingi ráði hvernig þeim aflaheimildum sé úthlutað. Hann sagði ósanngjarnt ef strandveiðimenn fengju alla byggðapotta.
„Þeir eru ekki þessir máttarstólpar á landsbyggðinni. Það er mikill misskilningur.“
Hann sagði jafnframt að það skipti máli að horfa ekki eingöngu á þorsk þegar rætt væri um hlutdeild smábáta, heldur allar tegundir. Að hans mati væri ekki sjálfgefið að velja aðeins þá tegund sem væri arðbærust og auðveldust að sækja.
Segir lítið mark takandi á umfjöllun Berlingske
Undir lok viðtalsins var Guðmundur spurður út í umfjöllun danska blaðsins Berlingske um íslenskan sjávarútveg. Hann sagði blaðamanninn sem vann umfjöllunina hafa sent sér fyrirspurnir í vetur, en að svör Brims hefðu ekki fengið mikið vægi í lokaafurðinni.
Guðmundur sagði blaðamanninn ekki hafa verið starfsmann blaðsins heldur verktaka og kvaðst hafa séð svipaðar atlögur áður.
„Ég er orðinn það gamall að ég er búinn að sjá þetta svo oft svona, síðustu þrjátíu árin.“
Spurður hvort hann gæfi lítið fyrir umfjöllunina tók hann ekki beinlínis undir það orðalag, en sagði að hann ætti spurningarnar og svörin öll skrifleg og að lítið mark hefði verið tekið á hans sjónarmiðum.
