Inga Sæland sagðist ekki hafa orðið vör við viðbrögðin í salnum á meðan hún flutti ræðu sína en kvaðst taka gagnrýninni með ró. Hún sagði hluta forystu kennara jafnan sjá allt til foráttu þegar rætt væri um breytingar á sviði menntamála og nefndi þar meðal annars umræðu um PISA, einkunnakerfi, kennsludaga, lestraraðferðir, lengd kennaranáms og símanotkun í skólum.
Segir samráð hafa átt sér stað
Í viðtalinu var vísað til þess að kennarar hefðu lýst óánægju með skort á samráði, meðal annars um fyrirhugað bann eða takmarkanir á snjalltækjanotkun í skólum. Inga hafnaði því að ekki hefði verið haft samráð og sagði að svonefndir spretthópar hefðu starfað um skólamál frá því í febrúar með þátttöku fulltrúa frá bæði Miðstöð menntunar og skólaþjónustu og Kennarasambandi Íslands.
Inga sagðist auk þess hafa átt ítarleg samtöl við fulltrúa kennara um þær hugmyndir sem nú væru til umræðu. Þá vísaði hún sérstaklega á bug ummælum Magnúsar Þórs Jónssonar, formanns Kennarasambands Íslands, um að hugmyndir hennar um breytingar á einkunnakerfinu hefðu komið á óvart. Ráðherrann sagði hann hafa verið vel upplýstan um hugmyndirnar og vitað nákvæmlega í hvaða átt hún vildi fara.
Vill skipta út bókstöfum fyrir tölustafi
Eitt það sem vakti mesta athygli í ræðu Ingu á kennaraþinginu voru hugmyndir um að leggja af bókstafaeinkunnir í grunnskólum og taka í staðinn upp tölustafakerfi. Hún sagði núverandi kerfi vera óskýrt, bæði fyrir foreldra og nemendur, og taldi að skort hefði á gagnsæi um raunverulega stöðu barna í námi.
Að hennar mati myndi talnakerfi einfalda stöðumat, auka skýrleika og auðvelda yfirfærslu nemenda úr grunnskóla yfir í framhaldsskóla. Hún sagði jafnframt að skólastjórnendur á framhaldsskólastigi þyrftu nú þegar að umbreyta bókstafakerfinu yfir í talnakerfi þegar nemendur hæfu nám þar.
Í könnun sem Reykjavík síðdegis stóð fyrir síðasta sólarhring sögðust 85,4 prósent svarenda vilja tölustafi fremur en bókstafi í einkunnagjöf grunnskóla. Þá sögðust 9,7 prósent ekki hafa skoðun og 4,9 prósent vildu halda bókstafakerfinu.
Kennarar segja breytinguna ekki einfalda
Magnús Þór hafði þó bent á að þrátt fyrir að breytingin kynni að hljóma einföld væri um verulega kerfisbreytingu að ræða fyrir kennara, meðal annars vegna samspils hennar við símat og annað námsmat. Inga tók undir að laga þyrfti ákveðna umgjörð, meðal annars í aðalnámskrá, en sagði ekki vera um mikið vandamál að ræða að hennar mati og samkvæmt þeim ráðgjöfum sem hún styddist við innan stjórnkerfisins.
Hún sagðist ekki enn geta gefið upp nákvæma dagsetningu um hvenær nýtt kerfi tæki gildi, en markmiðið væri að vinna málið eins hratt og unnt væri. Breytingarnar gætu mögulega tekið gildi í haust, en annars á næsta ári.
Segir námsárangur barna óviðunandi
Ráðherrann lagði mikla áherslu á að ástandið í íslensku skólakerfi væri það alvarlegt að ekki væri lengur hægt að bíða. Hún sagði allt of stóran hóp drengja útskrifast úr grunnskóla með slakan lesskilning eða illa læsan eftir tíu ára skólagöngu, með þeim afleiðingum að margir flosnuðu upp úr námi síðar meir og ættu í verulegum vanda.
Inga sagðist ekki ætla að vera sá menntamálaráðherra sem sæti hjá og horfði á þróunina versna. Hún lýsti því yfir að hún liti á sig sem verkfæri til að snúa óheillaþróun við og kvaðst biðja kennara um stuðning, hjálp og samvinnu.
Ungmenni aðstoða við reglugerð um símanotkun
Þegar viðtalið fór fram sat ráðherrann jafnframt á vinnustofu með um fimmtíu ungmennum víðs vegar að af landinu þar sem unnið var að undirbúningi reglugerðar um símanotkun og aðgengi barna að samfélagsmiðlum í skólum.
Hún lýsti hópnum sem öflugum og sagði mikilvægt að fá börnin sjálf að borðinu þegar teknar væru ákvarðanir um þeirra eigin framtíð í skólakerfinu. Að hennar sögn ríkti gleði og metnaður í hópnum og umræðurnar væru bæði málefnalegar og uppbyggilegar.
Segist finna mikinn stuðning
Þrátt fyrir átökin á kennaraþinginu sagði Inga að viðbrögðin sem hún hefði fengið frá kennurum væru að stórum hluta jákvæð. Hún sagðist hafa fengið fjölda stuðningsyfirlýsinga, áskorana og hlýlegra skilaboða sem hvettu hana áfram. Aðspurð hvernig hún hafi brugðist við útgöngu nokkurra kennara sagði hún að sumir yrðu bara að fá að vera áfram sárir.
Að lokum ítrekaði hún að hún hygðist vinna áfram af krafti fyrir börn landsins og framtíð þeirra, með aðstoð starfsfólks ráðuneytisins og í samráði við þá sem kæmu að málaflokknum. Hún sagðist vonast til þess að Kennarasamband Íslands tæki þátt með henni í þeirri heildstæðu endurskoðun á aðalnámskrá sem fram undan væri.
