Bjarni, sem lifir og hrærist í grasrótinni alla daga, var gestur í Reykjavík síðdegis á Bylgjunni þar sem farið var yfir leiðirnar að fallegri garðflöt.
„Grasplantan elskar að láta slá sig,“ sagði Bjarni. „Því oftar sem við sláum, því þéttari verður svörðurinn.“
Hann segir að þegar gras sé slegið reglulega bregðist plantan við með því að mynda fleiri lauf og þéttari svörð. Þess vegna séu golfvellir slegnir mjög ört, jafnvel daglega eða annan hvern dag.
Róbótasláttuvélar henta vel
Bjarni segir róbótasláttuvélar sérstaklega góðar fyrir heimagarða vegna þess að þær slái lítið magn í einu og geri það oft.
„Þær eru mjög góðar í að slá á hverjum degi eða annan hvern dag,“ sagði hann.
Að hans sögn er ekkert að því að slá í rigningu, þó að blautt gras geti stundum klumpast og orðið ljótara á yfirborðinu. Ef slegið er oft falli þó lítið magn af grasi niður í hvert sinn og því verði vandinn minni.
Köfnunarefni skiptir mestu máli
Bjarni segir að í flestum heimagörðum sé það fyrst og fremst köfnunarefni sem skipti máli þegar kemur að áburði. Það sé fyrsta talan í svokölluðum NPK-tölum á áburðarpokum.
„Köfnunarefnið stýrir vextinum og hraðanum,“ sagði hann.
Hann líkir köfnunarefni við bensíngjöf á bíl. Meira magn þýði hraðari vöxt og grænna gras, en of mikið geti veikt grasið og gert það viðkvæmara fyrir sýkingum.
„Það er betra að setja aðeins minna og bæta svo við ef maður er ekki ánægður með litinn eða vöxtinn,“ sagði Bjarni.
Ekki endilega raka allt grasið burt.
Að sögn Bjarna getur það verið kostur að skilja fínt slegið gras eftir í sverðinum, sérstaklega þegar slegið er oft. Örverur í jarðveginum brjóti grasið niður og næringin nýtist aftur.
„Ef þú ert alltaf að slá og raka grasið í burtu ertu að fjarlægja næringarefni úr jarðveginum,“ sagði hann.
Þetta sé ein ástæða þess að róbótasláttuvélar geti dregið úr þörf fyrir áburð. Þær skili litlum grasögnum aftur niður í svörðinn þar sem þær brotna niður.
Mosatætari getur hjálpað
Ef mikið er af mosa eða sinu í grasinu segir Bjarni að gamli góði mosatætarinn geti komið sterkur inn.
Best sé að rífa mosann og sinuna upp, sá grasfræjum þar sem þörf er á og tryggja að fræin komist í snertingu við jarðveginn. Síðan megi bera áburð yfir og vökva létt eða bíða eftir rigningu.
Hann varar þó við of mikilli vökvun.
„Grasið er eins og við. Við fáum okkur glas af vatni en erum ekki með hausinn ofan í skálinni,“ sagði Bjarni.
Sérstaklega þurfi að halda yfirborðinu röku þegar grasfræ eru að spíra, enda hafi þau ekki myndað rótarkerfi til að sækja vatn dýpra í jarðveginn.
Róbótar að breyta golfvöllum
Bjarni segir róbótasláttuvélar einnig vera að gjörbreyta golfvöllum. Þær haldi röffsvæðum jafnari milli daga og minnki þörfina á því að reyndir starfsmenn eyði tíma í endurtekinn slátt.
„Verkefnalistinn okkar er aldrei búinn,“ sagði hann og bætti við að betra væri að nýta starfsfólk í önnur verkefni en að láta það keyra sláttuvélar fram og til baka.
Hann segir verðið á róbótasláttuvélum hafa lækkað hratt, bæði fyrir golfvelli og heimagarða.
Hybridvellir bjarga þegar á móti blæs
Í viðtalinu var einnig rætt um fullkomna grasfleti á stórum knattspyrnuvöllum á borð við Anfield og Laugardalsvöll. Bjarni sagði slíka velli oft vera svokallaða hybridvelli, þar sem gervitrefjar eru saumaðar inn í náttúrulegt gras.
Hann sagði það misskilning að hybridvöllur þýddi sjálfkrafa að völlurinn liti alltaf fullkomlega út.
„Hybridið snýst meira um að bjarga þér þegar þú lendir í vandræðum,“ sagði Bjarni.
Það skipti mestu máli yfir erfiða vetrar- og vormánuði þegar náttúrulega grasið gæti þynnst eða gefið eftir. Þá héldi hybridkerfið vellinum saman, boltinn rúllaði betur og leikmenn gætu treyst yfirborðinu.
„Það er þar sem hybridið kikkar inn,“ sagði Bjarni Þór Hannesson.
