Í viðtali í Bítinu á Bylgjunni sagði Sveinn að gervigreind væri fyrst og fremst notuð sem hjálpartæki, til dæmis við þýðingar, talgreiningu og önnur tímafrek verkefni. Á sama tíma hefði tæknin gert upplýsingaumhverfið flóknara og aukið kröfur um fagmennsku, gagnrýna hugsun og staðreyndaprófun.
Einfaldar tímafrek verkefni
Sveinn sagði niðurstöðurnar benda til þess að íslenskir fjölmiðlar noti gervigreind enn í hóflegu mæli og þá helst til að létta undir með blaðamönnum í ákveðnum verkefnum eins og að talgreina hljóðbút sem endar sem handrit.
Hann nefndi einnig að gervigreind gæti stytt þýðingarvinnu verulega og þannig sparað tíma í daglegu fréttastarfi. Ábyrgðin lægi þó alltaf hjá blaðamanninum sjálfum, sem þyrfti áfram að yfirfara efnið og staðfesta að allt væri rétt.
Segir upplýsingaóreiðu hafa aukist
Sveinn sagði gervigreind ekki aðeins fela í sér tækifæri heldur einnig nýjar áskoranir. Með aukinni notkun hennar hefði upplýsingaóreiða vaxið og það gerði störf blaðamanna flóknari.
Að hans sögn gæti það haft áhrif á traust til fjölmiðla ef notkun gervigreindar væri ekki skýr og gagnsæ. Hann taldi einmitt að þar lægi ein ástæða þess að viðmælendur hans hefðu verið nokkuð varkárir í umfjöllun sinni um notkun tækninnar.
Flestir miðlar enn án skýrrar stefnu
Í rannsókninni tók Sveinn viðtöl við ritstjóra og fréttastjóra á fjórum íslenskum fjölmiðlum, auk formanns Blaðamannafélags Íslands. Hann sagði að aðeins einn miðill hefði verið með skrifaða og aðgengilega stefnu um notkun gervigreindar.
„RÚV var eini miðillinn sem er með stefnu og er sem sagt með það opið fyrir alla.“
Að sögn Sveins eru aðrir miðlar frekar með óskráðar reglur eða vinnulag sem starfsmenn þekkja, en það dugi að hans mati ekki til lengdar.
Sveinn sagði íslenska fjölmiðla almennt vera skammt á veg komna í notkun gervigreindar miðað við þróunina erlendis. Þeir þyrftu að „gyrða sig í brók.“ Hann taldi ástæðurnar meðal annars vera takmarkað fjármagn og skort á sérsniðnum íslenskum lausnum.
Hann hvatti fjölmiðla til að bregðast skýrar við þróuninni og móta formlega stefnu um hvernig tæknin ætti að vera notuð, bæði gagnvart starfsfólki og almenningi.
Að mati Sveins er helsta áskorunin fram undan að tryggja ábyrga og gagnsæja notkun gervigreindar svo hún nýtist í þágu vandaðrar blaðamennsku, en grafi ekki undan henni.
