„Það er ákveðinn sigur að vera kölluð skipulagsdrottning,“ sagði hún og bætti við: „Það er mér ekki eðlislægt að vera skipulögð.“
Þóra Hrund sagði sig í grunninn meira hugmyndamanneskju en skipulagsmanneskju. Hún lýsti sér sem manneskju sem fengi stöðugt nýjar hugmyndir og vildi gera sem mest úr lífinu.
„Ég er svolítið kaotísk,“ sagði hún og bætti við að hún fengi „rosalega margar hugmyndir á hverjum einasta degi“.
Að hennar sögn varð hún snemma vör við að hugmyndir duga skammt ef ekkert kerfi er til staðar til að fylgja þeim eftir. „Ef maður er bara að fá hugmyndir en er ekki skipulagður á móti til þess að koma þessum hugmyndum í framkvæmd, að þá náttúrulega verða þetta bara hugmyndir.“
Segir fólk þurfa að finna sitt eigið kerfi
Í viðtalinu lagði hún áherslu á að það væri engin ein töfralausn til þegar kemur að skipulagi. Fólk þurfi að finna það sem virkar fyrir sig sjálft, út frá sínum aðstæðum, sínu lífi og því tímabili sem það er á.
„Það er ekki eitthvað svona eitt sem hentar öllum,“ sagði hún.
Þess vegna taldi hún mikilvægast að hver og einn byggi sér upp eigið kerfi. „Við þurfum að búa okkur til eitthvað svona system sem að hentar lífi okkar og passar okkur á hverju tímaskeiði í lífinu.“
Hefur trú á því að skrifa hlutina niður
Þóra Hrund sagði skrif skipta miklu máli í hennar eigin aðferðafræði. Hún hefur gefið út dagbækur í tólf ár og sagði stóran hóp kvenna kaupa bókina á hverju ári.
Að hennar mati gerist eitthvað þegar hlutirnir fara úr höfðinu og niður á blað. Hún sagði rannsóknir benda til þess að skrif hjálpi fólki að festa hluti betur í minni og ná betur utan um það sem skiptir máli.
Hún sagði líka að skrif þyrftu ekki alltaf að snúast um hefðbundna skipulagsdagbók, heldur mætti líka nota þau sem tæki til að vinna með hugsanir, tilfinningar og markmið.
Í upphafi skyldi endinn skoða
Þóra Hrund sagði að margir tengi skipulag fyrst og fremst við verkefnalista. Slíkir listar geti hjálpað, en þeir séu ekki endilega nóg einir og sér ef fólk sé sífellt að hlaupa frá einum lista yfir í annan.
Að hennar mati er betra að byrja á því að spyrja sig hvaða útkomu maður vilji fá. Hún orðaði það þannig að fólk ætti að hugsa „um útkomuna sem við viljum framkalla eða útkomuna sem við viljum ná“.
Hún nefndi að gott gæti verið að taka mismunandi svið lífsins fyrir, til dæmis fjölskyldu, heilsu, vinnu, heimili og umhverfi, og spyrja sig hvernig maður vilji að þau líti út.
Með því verði til skýrari mynd af því sem maður sé í raun að stefna að. Hún sagði líka spurningar vera sérstaklega öflugt verkfæri, því þær hjálpi huganum að beina sér að svari í stað þess að dreifast út um allt.
Þetta geti jafnt átt við um stór markmið og litla hluti í daglegu lífi.
Markmið geta veitt ró
Þóra Hrund sagði að skipulag þyrfti alls ekki alltaf að snúast um afköst, framleiðni eða ytri árangur. Það mætti líka snúast um líðan.
Hún tók dæmi um manneskju sem hefði verið mikið á hlaupum og upplifði mikinn óróa. Þá gæti markmiðið einfaldlega verið að fá meiri ró inn í vikuna.
„Mig langar rosalega að upplifa bara meiri ró og minni kaotik í þessari viku,“ sagði hún þegar hún lýsti svona hugsun.
Þaðan mætti svo vinna sig áfram og skoða hvaða litlu hlutir gætu stutt við þá útkomu, hvort sem það væri göngutúr, bað eða bara smá tími fyrir sjálfan sig.
Þarf ekki alltaf að vera árangursdrifið
Undir lok viðtalsins kom hún einnig inn á að markmið þyrftu ekki alltaf að vera tengd mælanlegum árangri. Stundum væri markmiðið einfaldlega að líða betur eða vera sáttari við sjálfan sig.
„Þetta þarf ekki alltaf að vera árangursdrifið,“ sagði hún.
Að hennar mati er það líka árangur að upplifa meiri vellíðan, meiri ró eða sterkari tengingu við það sem raunverulega skiptir máli.
Þóra Hrund sagði líka mikilvægt að fólk átti sig á því hver það er og hvað skipti það mestu máli. Það eigi sérstaklega við um fólk sem fær margar hugmyndir og á það til að fara úr einu verkefni yfir í annað.
Hún nefndi mikilvægi þess að „stilla áttavitann“ og sagði að þegar fólk vissi betur hvað það vildi, yrði líka auðveldara að velja hvaða hugmyndir ættu raunverulega erindi og hvaða hlutir mættu bíða.
