Einar lagði áherslu á að borgin þyrfti að opna á samstarf við atvinnulífið um rekstur leikskóla, á meðan Kristinn Jón sagði stærsta vandann vera manneklu og varaði við því að slíkar lausnir gætu aukið ójöfnuð og veikt núverandi leikskólakerfi.
Einar vill opna á samstarf við atvinnulífið
Einar sagði Framsókn hafa lagt til að fyrirtæki og stofnanir kæmu að rekstri leikskóla í samstarfi við borgina. Hugmyndin væri að vinnustaðir legðu til húsnæði á meðan borgin greiddi með hverju barni, og að plássin yrðu bæði fyrir börn starfsmanna og börn úr hverfunum.
Að hans mati væri þetta dæmi um þá fjölbreyttu nálgun sem margir segðust vilja sjá, en sem hefði ekki fengið brautargengi hjá núverandi meirihluta. Hann sagði tillögu Framsóknar hafa verið fellda þrátt fyrir að flestir tali um nauðsyn þess að brúa bilið með nýjum og fjölbreyttum lausnum.
Einar sagði líka að ekki væri hægt að halda áfram á sömu braut og búast við annarri niðurstöðu. Hann taldi að fleiri rekstrarform og fleiri spennandi vinnustaðir gætu hjálpað til við að laða fólk aftur inn í leikskólana, þar á meðal menntað starfsfólk og fólk sem hefði áður unnið í leikskólum en snúið sér að öðru.
Kristinn Jón vill ræða lengra fæðingarorlof og lögbindingu leikskólastigsins
Kristinn Jón sagði sig einnig tilbúinn að ræða nýjar lausnir, en lagði aðra áherslu á vandann. Hann sagði ríkið þurfa að koma mun sterkar að borðinu, meðal annars með lengingu fæðingarorlofs og umræðu um lögbindingu leikskólastigsins.
Að hans sögn væri það sérstakt að leikskólastigið hefði ekki sömu stöðu í lögum og víða annars staðar á Norðurlöndum. Hann sagði mikilvægt að ræða fyrsta skólastigið sem hluta af menntakerfinu og horfa jafnframt til snemmtækrar íhlutunar, aukins fjármagns og betri starfskjara til að laða fleiri til starfa í leikskólum.
Hann sagði fjárfestingu í fyrstu árum barna vera eina mikilvægustu samfélagsfjárfestinguna og að betri kjör og lengra fæðingarorlof gætu skipt þar miklu máli.
Óttast að fyrirtækjalausnir geti aukið ójöfnuð
Kristinn Jón sagðist þó ekki útiloka samtal um fjölbreyttari útfærslur, en sagðist hafa áhyggjur af því að fyrirtækjarekinn leikskólarekstur gæti haft óæskilegar afleiðingar. Hann nefndi sérstaklega að fyrirtæki gætu sogið til sín leikskólakennara úr núverandi skólum og þannig grafið undan kerfinu sem fyrir væri.
Þá velti hann því einnig upp hvort slíkt fyrirkomulag gæti aukið ójöfnuð ef fyrirtæki með tekjuhátt starfsfólk fengju aðgang að plássum með stuðningi úr sameiginlegum sjóðum á undan öðrum fjölskyldum. Hann spurði hvort börn starfsfólks stórra fyrirtækja ættu að komast framar í röðina en til dæmis börn hjúkrunarfræðinga eða rútubílstjóra.
Að hans mati þyrfti að rýna mjög vel í slíkar spurningar áður en farið væri af stað.
Deila um hvort breytingar eigi að snúa að kerfinu eða þjónustunni
Í umræðunni kom einnig fram ágreiningur um það hvernig bregðast eigi við þeim þrýstingi sem er á leikskólakerfið. Einar sagði sveitarfélög víða vera farin að draga úr þjónustu og taldi að foreldrar vildu fremur meiri sveigjanleika, til dæmis með breytilegri opnunartíma eftir þörfum vinnustaða og fjölskyldna.
Kristinn Jón benti hins vegar á að Reykjavík hefði þegar farið í ákveðnar breytingar, meðal annars með svokallaðri Reykjavíkuleið, sem hann sagði hafa skapað aukið svigrúm innan leikskólanna. Hann sagði fyrstu merki benda til þess að hluti foreldra hefði breytt vistunartíma barna sinna og að það gæti létt á kerfinu samhliða bættum starfsaðstæðum.
Einar sagðist styðja aðgerðir sem bæti starfsaðstæður leikskólafólks, en taldi um leið að ekki mætti láta kerfið laga þarfir fjölskyldna að sér í stað þess að þjónustan mætti raunverulegum þörfum borgarbúa.
Sameiginlegur flötur
Þrátt fyrir skýran hugmyndafræðilegan ágreining kom einnig fram undir lok umræðunnar að báðir væru tilbúnir að ræða fleiri leiðir. Þar bar meðal annars á góma mögulegar heimagreiðslur, sem Kristinn Jón sagði Pírata hafa verið reiðubúna að ræða innan meirihlutans.
Þannig var tónninn sá að þótt ágreiningurinn um leiðirnar væri mikill væru báðir sammála um eitt meginatriði: að leikskólamálin yrðu ekki leyst án breytinga.
