Í viðtali í Reykjavík síðdegis á Bylgjunni sagði Sigmundur að viðbrögð yfirvalda við málinu hafi vakið spurningar og taldi að það endurspegla víðtækari vanda sem hafi verið að þróast hér á landi.
Hann lýsti áhyggjum af aukinni skipulagðri glæpastarfsemi og ofbeldi og sagði að þróunin væri orðin hröð. Þá gagnrýndi hann að stjórnvöld og yfirvöld reyni að draga úr umræðu um vandann af ótta við að skapa ólgu í samfélaginu í stað þess að takast á við hann af festu.
„Þetta eru greinilega stórhættulegir ofbeldismenn komandi frá Palestínu. Ofstopafullir ofbeldismenn sem mynda sig með AK-47 og einhver tákn öfgahreyfinga. Það er ekki fólk sem við viljum hafa hér á landi hvort sem þeir hafa greitt félagsgjöldin til Hamas fyrir síðasta ár eða ekki.“
Gagnrýnir vinnubrögð í ESB-málum
Sigmundur beindi einnig gagnrýni að ESB-umræðunni og sagði svör Þorgerðar Katrínar Gunnarsdóttir á fundi utanríkismálanefndar hafa verið ófullnægjandi. Hann taldi stjórnarandstöðuna ekki hafa fengið skýr svör um samskipti ráðherrans við embættismenn í Brussel þrátt fyrir ítrekaðar fyrirspurnir.
Hann sagðist sérstaklega hafa viljað fá skýringar á því hvað hefði farið fram á fjölmörgum fundum erlendis en taldi ráðherrann hafa forðast efnisleg svör. Að hans mati sé umræðan um fyrirhugaða þjóðaratkvæðagreiðslu um áframhaldandi viðræður við Evrópusambandið byggð á óljósum og röngum forsendum.
Sigmundur hélt því fram að Ísland væri ekki umsóknarríki að Evrópusambandinu. Verið væri að endurtaka gamla umræðu í nýjum búningi. Hann sagði slíkt vera „leikrit“ sem almenningur ætti ekki að þurfa að horfa upp á á ný.
Segir fjármálaáætlun skorta trúverðugleika
Að lokum gagnrýndi Sigmundur nýja fjármálaáætlun ríkisstjórnarinnar og sagði hana hvorki trúverðuga né líklega til að skila árangri. Hann vísaði til þess að stefnt væri að hallalausum fjárlögum árið 2027 með einum milljarði króna í afgangi, sem jafngildi aðeins örlitlu broti af tekjum ríkisins.
Að hans mati séu forsendur áætlunarinnar veikar og lítið megi út af bera svo markmiðin náist ekki. Þá gagnrýndi hann að áfram væri gert ráð fyrir skatta- og gjaldahækkunum, þó að þær væru settar fram undir öðrum heitum.
Sigmundur sagði meginvandann liggja í sívaxandi ríkisútgjöldum og skorti á aðhaldi. Hann taldi nauðsynlegt að stjórnvöld sendu skýr skilaboð um sparnað og ábyrgð í ríkisfjármálum í stað þess að auka álögur á heimili og fyrirtæki.
„Það þarf alvöru inngrip og skýr skilaboð um að menn ætli að ná tökum á stöðunni,“ sagði hann.
