Þau voru ósammála um útfærslu borgarlínu innan Reykjavíkur, en bæði sögðu ástæðu til að flýta Miklubrautargöngum.
Hildur sagði að þótt oft væri talað um að ríkið bæri stærstan hluta kostnaðar af samgöngusáttmálanum væri myndin ekki svo einföld. Að hennar sögn kæmi stór hluti fjármögnunarinnar beint úr vösum fólks sem keyrir um götur höfuðborgarsvæðisins.
„Ríkið byrjar að innheimta það fé beint úr vösunum á fólki sem keyrir hér um götur borgarinnar,“ sagði hún og bætti við að um yrði að ræða veggjöld.
Þá benti hún á að þessi gjaldtaka kæmi ofan á kílómetragjald.
Hún sagðist vilja fá skýr svör um það hvort og hvernig ætti að leggja slík gjöld á. Að hennar mati væri ekki hægt að halda áfram að skipuleggja kostnaðarsamt kerfi án þess að fyrir liggi hvernig eigi að fjármagna það.
Varar við raski á Suðurlandsbraut
Hildur sagði að mestar áhyggjur hefði hún af því hvernig framkvæmdum yrði háttað á Suðurlandsbraut. Hún lýsti svæðinu sem einu stærsta atvinnusvæði borgarinnar og sagði þar vera atvinnurými sem samsvaraði „heilli Smáralind“.
Að hennar sögn eru 2.400 manns starfandi á svæðinu og fyrirtækin við Suðurlandsbraut skila samanlagt 166 milljörðum króna í tekjur á ári.
Hún sagði að á svæðinu væru fyrirtæki með fjölbreytta starfsemi, þar á meðal skurðstofur og verslanir sem seldu stór heimilistæki og að viðskiptavinir þeirra kæmu ekki endilega með almenningssamgöngum eða á reiðhjóli.
Hildur sagði að fækkun bílastæða og mikið rask á framkvæmdatíma gæti haft veruleg áhrif á rekstur fyrirtækja á svæðinu. Hún sagðist vilja endurhugsa útfærsluna, meðal annars hvernig svokölluðu þversniði götunnar yrði háttað og hvort þörf væri á tvöföldum hjólastígum beggja vegna brautarinnar.
Pétur segir ekki mega stoppa verkefnið
Pétur varði samgöngusáttmálann og sagði hann vera mikilvægt verkefni fyrir allt höfuðborgarsvæðið, ekki aðeins Reykjavík. Hann benti á að á hverjum degi kæmu um 40 þúsund bílar úr öðrum sveitarfélögum inn í borgina vegna vinnu og skóla.
Að hans mati væri ekki skynsamlegt að taka samninginn upp aftur og tefja frekar framkvæmdir. „Ég held þetta sé frábær samningur og við megum ekki taka hann upp núna og tefja þetta allt saman,“ sagði hann.
Pétur sagði jafnframt að tæplega helmingur fjárins færi í hefðbundnar vegaframkvæmdir og að borgarlínan ætti ekki að þrengja að umferð heldur greiða fyrir henni.
„Bílar munu komast hraðar á milli vegna þess að borgarlínan mun flytja miklu, miklu fleira fólk,“ sagði hann.
Segir almenningssamgöngur geta styrkt Suðurlandsbraut
Pétur hafnaði því að breytingar á Suðurlandsbraut þyrftu að vera slæmar fyrir fyrirtæki á svæðinu. Hann sagði að hágæða almenningssamgöngur gætu þvert á móti flutt fleira fólk á svæðið og dregið úr þörf fyrir bílastæði.
Að hans mati gæti það styrkt verslun og þjónustu til lengri tíma. Hann sagði að reynslan annars staðar sýndi að við stórar stoppistöðvar almenningssamgangna gætu viðskipti blómstrað og fasteignaverð jafnvel hækkað.
Pétur sagði einnig að ef fólk fengi raunverulegan valkost væri ekki ástæða til að ætla að Íslendingar yrðu eina þjóðin sem nýtti ekki gott almenningssamgöngukerfi. Hann vísaði til kannana sem sýndu að margir þeirra sem sitja fastir í umferð vildu ferðast öðruvísi til og frá vinnu.
Þrátt fyrir harðar deilur um borgarlínuna náðu þau saman um ða ástæða væri til að flýta Miklubrautargöngum.
Hildur sagði göngin vera allt of aftarlega á dagskrá og taldi að þau myndu greiða verulega fyrir umferð þegar þau kæmust til framkvæmda. Pétur tók í sama streng og sagði þau eitt af þeim verkefnum sem væru bæði augljós fyrir almenning og gætu bætt umferð, öryggi og ásýnd borgarinnar.
Í lokin barst umræðan að bílastæðagjöldum í miðborg Reykjavíkur. Hildur gagnrýndi harðlega að rukkun hefði verið lengd fram á kvöld, tekin upp á sunnudögum og gjaldsvæði stækkuð. Hún sagði Sjálfstæðisflokkinn vilja bakka með þær breytingar.
Pétur sagðist þar að hluta til sammála henni og sagði breytingarnar hafa komið of hratt og verið illa kynntar. Hann sagði jafnframt að fólk ætti að vera velkomið í miðbæinn.
Þrátt fyrir ágreining um leiðina sögðu þau bæði að Reykjavík væri góð borg. Pétur sagði hana „frábæra borg“ og Hildur sagðist elska hana en bæta þyrfti þjónustuna.
