Að sögn Ásgeirs Þórs Ásgeirssonar aðstoðarlögreglustjóra er markmiðið að nýta dróna sem fyrsta viðbragð í útköllum. Þegar uppbyggingu kerfisins lýkur verður hægt að ná yfir um 95 prósent þéttbýlis á höfuðborgarsvæðinu, en fimmta drónadokkan er nú í uppsetningu að því er fram kom í Reykjavík síðdegis á Bylgjunni.
Hægt er að setja dokkurnar á byggingar, bílastæði eða jafnvel farartæki. Með réttum aðgangi er hægt að stýra þeim úr fjarlægð, hvar sem er í heiminum. Drónarnir fljúga beina leið á vettvang og geta náð um einn kílómetra á mínútu, án þess að taka tillit til umferðartafa.
Nýtast við fjölbreytt verkefni
Tæknin hefur þegar sannað gildi sitt í fjölbreyttum verkefnum. Samkvæmt Ásgeiri hefur lögreglan nýtt dróna í yfir hundrað tilvikum á undanförnum mánuðum.
Meðal annars voru drónar notaðir í mikilli snjókomu í október til að kortleggja umferðarhnúta og leiðbeina moksturstækjum. Þá hafa þeir verið sendir fyrstir á brunavettvang, þar sem hitamyndavélar þeirra hjálpa slökkviliði að staðsetja heitustu punkta og bregðast markvisst við.
Einnig hafa drónar komið að gagni í baráttu gegn afbrotum. Þeir hafa meðal annars verið notaðir til að rekja grunaða innbrotsþjófa, fylgja bifreiðum og leiðbeina lögreglu að vettvangi. Í einu tilviki var hópur staðsettur eftir skipulagðan búðarþjófnað þar sem dróninn fylgdi flóttabíl og leiddi lögreglu bæði að þýfi og gerendum.
Geta fylgt einstaklingum og sent mynd í rauntíma
Drónarnir eru búnir öflugum myndavélum, bæði hefðbundnum og hitamyndavélum, og geta sent myndefni beint í stjórnstöð lögreglu. Þar geta starfsmenn fylgst með aðstæðum í rauntíma og stýrt aðgerðum á vettvangi.
Að sögn Ásgeirs er jafnvel hægt að „læsa“ drónanum á einstakling eða farartæki og fylgja því eftir þar til lögregla kemur á staðinn.
Spara tíma og draga úr hættu
Notkun dróna getur einnig dregið úr hættu þegar lögregla veitir eftirför þar sem unnt er að fylgjast með ökutækjum úr lofti í stað þess að elta þau á miklum hraða. Þá nýtast þeir vel í leit og björgun, til dæmis við leit að fólki eða í aðstæðum þar sem grunur er um slys.
Í einu tilviki var tilkynnt um mann í sjó við Skerjafjörð. Dróni var sendur á vettvang og staðfesti á fáeinum mínútum að um misskilning væri að ræða, sem sparaði umfangsmikla útkallsaðgerð.
Hluti af framtíð lögreglustarfa
Uppbygging kerfisins hefur verið umfangsmikil og krafist bæði tæknilegrar vinnu og mats á áhrifum á persónuvernd. Þá hefur þurft að þjálfa fjölda lögreglumanna í notkun búnaðarins.
Samstarf er á milli lögregluembætta, meðal annars við embættið á Norðurlandi eystra og geta lögreglumenn stýrt drónum þvert á svæði. Að sögn Ásgeirs er ljóst að tæknin muni gegna sífellt stærra hlutverki í framtíðinni.
„Þetta breytir leiknum,“ segir hann og bætir við að í framtíðinni megi gera ráð fyrir að dróni verði í sumum tilvikum fyrstur á vettvang þegar kallað er eftir aðstoð lögreglu.
