Í viðtali í Reykjavík síðdegis á Bylgjunni sagði Árni að undirbúningur gengi vel og að hluthafahópur félagsins hefði stækkað. Hann rifjaði upp að hugmyndir um fasta vegtengingu til Eyja væru ekki nýjar af nálinni.
„Fyrsta þingsályktunartillagan um vegtengingu til Eyja var lögð fram fyrir 37 árum,“ sagði Árni og bætti við að á þeim tíma hefðu þó skort nægilega vandaðar rannsóknir til að hægt væri að leggja raunhæft mat á framkvæmdina.
Kostnaður gæti ráðist af rannsóknum
Að sögn Árna er ekki lengur spurning hvort tæknilega sé hægt að ráðast í slík göng, heldur hversu flókið og kostnaðarsamt verkefnið yrði. Þar kunni kostnaðurinn að ráðast af niðurstöðum jarðfræðilegra rannsókna og mælinga.
„Það er eiginlega búið að fullyrða að það sé hægt að gera þetta,“ sagði Árni. Óvissan snúist hins vegar um hvort verkefnið myndi kosta um 60 milljarða króna eða allt að 160 milljarða.
Gert er ráð fyrir að göngin verði um 18 kílómetra löng. Til skoðunar er að þau taki land í Austur-Landeyjum á svæði við bæinn Kross eða í nágrenni hans og opnist í Hánni sunnan við Sprönguna í Vestmannaeyjum.
Misgengi er stærsti óvissuþátturinn
Árni sagði að eldvirkni væri ekki talin stærsti óvissuþátturinn á þeirri leið sem nú væri helst til skoðunar. Meira skipti máli hvernig berggrunnur og misgengi undir sjávarbotni reyndust.
Til standi að bora rannsóknarholur bæði í Eyjum og í Landeyjum. Jafnframt verði ráðist í botnmælingar á hafsbotninum með aðstoð ÍSOR og Vegagerðarinnar. Niðurstöður þeirra rannsókna eigi að varpa skýrara ljósi á hvort framkvæmdin sé raunhæf og á hvaða kostnaðarstigi hún gæti legið.
Árni sagði að kjarnaboranir ættu að liggja fyrir í apríl og maí og að vonir stæðu til þess að unnt yrði að leggja fram raunhæfari kostnaðaráætlun síðsumars eða um haustið.
Telur göngin geta gjörbreytt stöðu Eyja
Að mati Árna gætu göng til Vestmannaeyja haft byltingarkennd áhrif á samfélagið, ekki aðeins í Eyjum heldur einnig á Suðurlandi. Hann sagði tenginguna geta styrkt ferðaþjónustu verulega, bætt aðgengi að heilbrigðisþjónustu og menntun og aukið öryggi íbúa.
Hann benti á að íbúafjöldi í smærri sveitarfélögum á Suðurlandi hefði vaxið mikið undanfarin ár, á meðan íbúafjöldi í Eyjum hefði staðið nær í stað. Að hans mati gætu göng breytt því og skapað ný tækifæri fyrir atvinnulíf og þjónustu.
Þá nefndi hann sérstaklega ferðaþjónustu sem einn helsta burðarásinn í mögulegri fjármögnun verkefnisins. Árlega komi tugir skemmtiferðaskipa til Eyja og með föstum samgöngum gætu skapast ný tækifæri fyrir ferðamenn til að ferðast á milli Eyja og Suðurlands.
Reiknað með veggjöldum en ekki ríkisframlagi
Árni sagði ekki gert ráð fyrir að ríkið fjármagni framkvæmdina með beinum hætti. Hugmyndin sé fremur sú að verkefnið verði fjármagnað með veggjöldum, í anda Hvalfjarðarganga á sínum tíma.
„Eyjagöng yrðu svona eins og Spölur var með Hvalfjarðargöng,“ sagði hann og bætti við að félagið hefði leitað ráða bæði hjá fyrrverandi forsvarsmönnum Spalar og erlendum aðilum, meðal annars í Færeyjum og Noregi, þar sem reynsla er af stórum jarðgangaverkefnum.
Tímaramminn er metinn á átta til tíu ár
Verði niðurstöður rannsókna jákvæðar telur Árni að heildartími verkefnisins, frá frekari undirbúningi og framkvæmdum þar til hægt verði að aka í gegnum göngin, geti numið átta til tíu árum.
„Við getum sagt að tíminn sé svona tíu ár,“ sagði hann en grínaðist með þáttastjórnendum að bjóða þeim í ísbíltúr um göngin eftir átta ár.
Hann lagði þó áherslu á að fyrst þyrfti að ljúka vönduðum rannsóknum og fara yfir niðurstöðurnar af yfirvegun.
„Það þýðir ekkert að vera að fullyrða eitthvað núna. Við skulum bara fara í þessar rannsóknir, vanda þær í alla staði og geta þá lagt fram niðurstöðu sem veitir okkur styrk til framhaldsins,“ sagði Árni Sigfússon.
