Málið var rætt í Reykjavík síðdegis á Bylgjunni í dag í kjölfar frétta um að flugfreyja hjá hollenska flugfélaginu KLM hefði sýnt einkenni Hantaveiru eftir náin samskipti við farþega af skipinu. Enn er verið að rannsaka hvort hún sé smituð.
Hantaveirur eru heill flokkur veira
Erna útskýrði að Hantaveirur væru ekki ein tiltekin veira heldur heill flokkur veira með mörgum undirtegundum.
„Þetta er flokkur af veirum. Það eru margar týpugreiningar af þessu og margir flokkar og ein þeirra heitir Andes-veira,“ sagði hún.
Samkvæmt upplýsingum frá World Health Organization (WHO) og European Centre for Disease Prevention and Control (ECDC) hefur Andes-týpa Hantaveiru greinst í að minnsta kosti einu eða tveimur sýnum sem tengjast málinu.
Meðgöngutíminn getur verið allt að sex vikur
Í viðtalinu kom fram að meðgöngutími Hantaveira geti verið langur.
„Meðgöngutíminn getur verið ein til sex vikur, þótt flestir veikist 7 til 14 dögum eftir útsetningu,“ sagði Erna.
Hún sagði smit milli manna ekki jafn auðvelt og til dæmis með Covid-19, en þó hefði áður verið lýst tilfellum þar sem smit rakist milli einstaklinga.
„Það þarf nálægð við sýktan einstakling í talsverðan tíma. Þetta er mun erfiðara heldur en til dæmis að smitast af Covid-veiru,“ sagði hún.
Dánartíðni talin geta verið allt að 50 prósent
Aðspurð um hættuna af veirunni sagði Erna að takmörkuð reynsla væri til staðar af slíkum hópsmitum, en vísindarit bentu til þess að dánartíðni gæti verið há, frá 20 upp í 50 prósent.
Hún tók þó fram að það færi meðal annars eftir undirtegund veirunnar og undirliggjandi heilsu þeirra sem sýktust.
Getur valdið öndunarbilun og blæðandi hitasótt
Erna sagði einkenni Hantaveiru geta verið mjög alvarleg.
Annars vegar gæti fólk fengið hratt versnandi öndunarfærasýkingu sem leiddi til öndunarbilunar. Hins vegar væri til afbrigði sem lýsti sér sem blæðandi hitasótt.
„Fólk verður mjög veikt mjög hratt, fær háan hita, meðvitundarskerðingu og hraðan gang sjúkdómsins,“ sagði hún.
Þrátt fyrir alvarleika málsins segir Erna íslenska heilbrigðiskerfið vel undirbúið ef tilfelli kæmu upp hér á landi.
„Við erum eins tilbúin og hugsast getur. Ísland lærði mjög mikið af Covid-faraldrinum,“ sagði hún.
Hún sagði engan vita til þess að hantaveira hefði greinst á Íslandi hingað til.
Segir ekki ástæðu til ótta hér á landi
Erna sagði málið þó minna á hversu hratt nýir smitsjúkdómar gætu komið fram.
„Þetta er náttúrulega grafalvarlegt mál þegar svona veirur sem maður hefur hingað til talið að séu aðallega frá nagdýrum fara svona inn á milli manna,“ sagði hún.
Hún lagði þó áherslu á að almenningur hér á landi þyrfti ekki að hafa sérstakar áhyggjur vegna þessarar uppákomu eins og staðan væri núna.
„Við höfum ekki ástæðu til að hafa áhyggjur af þessari ákveðnu uppákomu á þessu skipi,“ sagði hún.
Ekkert bóluefni er til við Hantaveiru að sögn Ernu.
