Málið var rætt í Reykjavík síðdegis á Bylgjunni í kjölfar umfjöllunar í kvöldfréttum Sýnar þar sem fram kom að á sjötta tug einstaklinga hefði verið vísað úr landi á þessu og síðasta ári eftir afbrot hér á landi. Þar sagði Ásgeir Þór Ásgeirsson, yfirlögregluþjónn hjá lögreglunni á höfuðborgarsvæðinu, að málaflokkurinn væri nú tekinn fastari tökum en áður.
„Ég tek algjörlega undir þetta því þetta er ein af grunnforsendunum fyrir því að við berjumst á móti skipulagðri glæpastarfsemi,“ sagði Víðir í þættinum.
Segir mikilvægt að aðgreina hópana
Víðir sagði mikilvægt að stjórnvöld geri skýran greinarmun á fólki sem leitar verndar hér á landi í góðum tilgangi og þeim sem koma hingað til að fremja afbrot.
„Langstærsti hlutinn er fólk sem fylgir öllum þeim lögum og reglum sem við setjum. Síðan er þessi hópur sem kemur hér inn í þeim tilgangi einum að brjóta lög og er oft hluti af skipulagðri brotastarfsemi og við þurfum bara að taka mjög fast á því,“ sagði hann.
Hann sagði núverandi fyrirkomulag skapa vandamál þar sem einstaklingum væri vísað úr landi en þeir kæmu síðan aftur til landsins á skömmum tíma.
„Það er þetta með endurkomubannið sem skiptir mjög miklu máli í þessu,“ sagði hann.
Vill aukið upplýsingaflæði
Víðir sagði jafnframt að Ísland þyrfti að efla samstarf og upplýsingamiðlun milli lögregluembætta í Evrópu til að styrkja baráttuna gegn skipulagðri glæpastarfsemi.
Hann nefndi að nú væri unnið að því að auka möguleika á miðlun upplýsinga um einstaklinga milli landa, þannig að ekki aðeins fingraför heldur einnig ljósmyndir og aðrar persónugreinanlegar upplýsingar væru aðgengilegar í sameiginlegum gagnagrunnum.
„Í dag er þetta mjög takmarkað, bara fingraför og það nafn sem viðkomandi hefur gefið upp. Síðan kannski bara kemur hann að okkur allt öðru nafni,“ sagði Víðir.
Hann sagði allsherjar- og menntamálanefnd hafa heimsótt höfuðstöðvar Europol í vetur til að kynna sér hvernig önnur Evrópuríki tækju á skipulagðri glæpastarfsemi.
Frumvarp væntanlegt á næsta þingi
Aðspurður hvort vinna væri þegar hafin við lagabreytingar sagði Víðir að nokkur frumvörp hefðu þegar verið samþykkt á yfirstandandi þingi sem miðuðu að því að skerpa lagaumhverfið í þessum málaflokki.
Hann sagði þó að þær breytingar sem Ásgeir Þór hefði sérstaklega kallað eftir væru væntanlegar inn á næsta þing.
„Þetta er eitthvað sem við eigum von á því að komi inn á næsta þingi og verði alveg örugglega afgreitt hratt og örugglega um leið og það kemur inn,“ sagði hann.
Brottfararstöð í stað gæsluvarðhalds
Í viðtalinu var einnig rætt um fyrirhugaða brottfararstöð fyrir fólk sem bíður brottvísunar úr landi. Víðir sagði frumvarp um slíkt úrræði nú í vinnslu hjá allsherjar- og menntamálanefnd.
Samkvæmt breytingum sem nú eru til skoðunar yrðu börn og fjölskyldur ekki vistuð í sjálfri brottfararstöðinni heldur í sérstöku úrræði þar sem fjölskyldur héldust saman.
„Það er enginn áhugi á því í neinum flokkum að börn verði með einhverjum hætti frelsissvipt,“ sagði Víðir.
Hann sagði stöðuna í dag þá að foreldrar sem hefðu fullnýtt allar kæruleiðir og brotið gegn vægari úrræðum væru settir í gæsluvarðhald á Hólmsheiði meðan börn þeirra færu í fóstur hjá barnaverndaryfirvöldum.
„Það er heldur ekki góð staða, hvorki varðandi foreldrana né börnin,“ sagði Víðir að lokum.
